ԱՎԾ պետի ազնվությանը չենք կասկածում, բայց վերևից ստանում է հրահանգ՝ ցույց տալ 2,6 տոկոսի գնաճ
Լիակատար անկախություն չկա, ամենալավ անկախությունը կախվածությունն ընտրելու կամավոր տարբերակն է: Այս մասին, այսօր՝ փետրվարի 28-ին, ԱԺ-ում «Պաշտոնական վիճակագրության մասին» օրենքի նախագծի քննարկման ժամանակ նշեց ԱԺ փոխնախագահ Միքայել Մելքումյանը՝ անդրադառնալով վիճակագրական մարմինների անկախության խնդրին:
«Ծառուկյան» խմբակցության պատգամավոր, տնտեսագետ Վարդան Բոստանջյանը հարց ուղղեց. «Մեզ մոտ գնաճը պաշտոնապես 2,6 է, բայց քաղաքացին հասկանում է, որ դա իրական չէ, սարսափելի գնաճի հետ գործ ունենք: Հիմա նոր օրենքով կկարողանա՞նք բարձրացնել անկախության աստիճանը»:
Ի պատասխան Միքայել Մելքումյանը նշեց. «Այսինքն մենք համոզված ենք, որ Ստեփան Մնացականյանն ազնիվ է (Ազգային վիճակագրական ծառայության պետ-խմբ), նրա ազնվության վրա կասկածներ չունենք, բայց վերևից ստանում են հրահանգ՝ ցույց տալ 2,6 տոկոսի գնաճ: Հիմա մնում է տեսնել, նա կկարողանա՞ դիմակայել այդ հրահանգին, թե կարող է անկախ գործել»:
Նա որպես վիճակագրական մարմնի անկախության աստիճանի բարձրացման տարբերակ նշեց. «Հիմա կարող ենք առաջարկել, որ վիճակագրական պետական խորհրդի կազմը ընտրվի ԱԺ-ի կողմից: Այդ դեպքում դեռ հարց է անկախությունը կմեծանա, թե ոչ, բայց հաշվետվողականությունը կմեծանա: Մենք պետք է կարողանանք պատասխանատվության այնպիսի գործիքներ դնենք օրենքում, որ նվազեցվի կեղծ տվյալների քանակը: Օրինակ, եթե մենք չենք հավատում, որ գնաճը 2,6 տոկոս է, եղե՞լ է դեպք, որ մտնենք դատարան վիճարկենք դա: Չի եղել»:
Նշենք, որ «Պաշտոնական վիճակագրության մասին» օրենքի ընդունումը պայմանավորված է պետական վիճակագրության մասին ՀՀ օրենքը միջազգային, հատկապես ՄԱԿ-ի Եվրոպական տնտեսական տարածաշրջանի երկրների համար սահմանված ստանդարտներին և 2015-ի դեկտեմբերի 6-ի փոփոխություններով ՀՀ սահմանադրությանը համապատասխանեցնելու անհրաժեշտությամբ: