Զոհված զինծառայողը մկրտված չի եղել, և հանձնարարվել է եկեղեցական կարգ կատարել՝ զուտ կրքերը հանդարտեցնելու համար. Շիրակի թեմի առաջնորդ

Շիրակի թեմի առաջնորդ Միքայել եպիսկոպոս Աջապահյանը վրդովված է, թե ինչպես կարող են իր 19 տարվա անբասիր ծառայությունը հավասարեցնել զրոյի՝ հայտարարելով, թե ինքը արգելել է չմկրտված զինծառայող Գրիգոր Եղոյանին եկեղեցական կարգով հուղարկավորել, երբ ինքն ընդամենը առաջարկել է հուղարկավորել քաղաքացիական ծեսով և բացատրել, թե ինչու է անթույլատրելի եկեղեցական կարգով հուղարկավորելը:

Tert.am-ի հետ զրույցում սրբազանը նշեց, թե իր հետ ոչ ոք չի եկել և չի խոսել, բացառությամբ մեկ անձից, ով զուտ հարց է տվել, թե կարո՞ղ է եկեղեցում դրվել զինվորի դին, եթե մկրտված չէ: «Հարց է տվել, բացատրել եմ, ասել է շնորհակալություն ու գնացել է, հետո իմացել եմ, որ խմորվել է հարցը, ինչ-որ բաներ են անում, ես տեղյակ եմ եղել միայն այն ժամանակ, երբ որ եկեղեցի էին մտնում: Զանգեցի գյուղապետին ասացի ի՞նչ է կատարվում, ասեց «բա չեմ կարող ժողովրդին կանգնեցնել», ասացի «դե լավ, ինչ ուզում եք արեք»:

Այսինքն՝ որևէ արգելք չի եղել, ու չի էլ կարող լինել զոհված զինվորի նկատմամբ»,-ասաց նա:

Միքայել եպիսկոպոս Աջապահյանը նշեց, թե երբ իմացել է, որ զինծառայողը մկրտված չի, ընդամենը առաջարկել է քաղաքացիական ծեսով հուղարկավորել: «Քի՞չ մարդկանց ենք քաղաքացիական ծեսով հուղարկավորում, ժողովրդի կեսը քաղաքացիական ծեսով է հուղարկավորվում, զինվորների կեսն էլ քաղաքացիական ծեսով է թաղվում և ոչ մի խնդիր չի լինում, չգիտես ինչու այս անգամ խնդիր դարձավ, կամ քի՞չ հերոսներ են քաղաքացիական ծեսով հուղարկավորվել: Ընդամենը առաջարկ է եղել՝ քանի որ մկրտված չէ, քաղաքացիական ծեսով հուղարկավորեք, ո՞վ ասաց, որ արգելվել է, թույլ չի տրվել, ո՞վ ասաց, որ դեմ ենք, անընդունելի է գյուղացիական խոսքուզրույցը դարձնել նման խնդիր: Ես ինքս եմ բոլոր զինվորներին եկեղեցով հուղարկավորելու հիմքը դրել, Ապրիլյան պատերազմի բոլոր զինվորներին ես եմ պնդել և պարտադրել, որ եկեղեցում դրվեն»,- ասաց նա և նշեց, թե նույնիսկ այս զինվորի դեպքում, երբ իր բացատրությունից հետո էլ այդուհանդերձ որոշել են եկեղեցական կարգով թաղել, ինքն է ընդառաջ գնացել է զուտ կրքերը հանդարտեցնելու համար:

Հիշեցնենք, որ փետրվարի 22-ին Արցախում հակառակորդի կողմից արձակված կրակոցից զոհված Ախուրյանի բնակիչ Գրիգոր Եղոյանի հարազատները ցանկացել են տղային հուղարկավորել եկեղեցական կարգով, սակայն, նրանց բացատրել են, որ չեն կարող եկեղեցում դնել նրա դին, քանի որ տղան մկրտված չէ, ինչը հարազատների ու գյուղացիների վրդովմունքի պատճառ է դարձել: Շիրակի թեմի առաջնորդ Միքայել եպիսկոպոս Աջապահյանի մերժումը ստանալուց հետո ախուրյանցիները միասնաբար որոշել են անտեսել եկեղեցու ընդդիմությունն ու զոհված զինվորի դին տարել են եկեղեցի: Այս իրավիճակը բազմաթիվ քննադատությունների առիթ է դարձել Շիրակի թեմի առաջնորդի հասցեին։ Նրան նույնիսկ բաց նամակ է հղվել՝ նշելով, թե հանուն հայրենյաց զոհված զինվորի դին եկեղեցում դնելու արգելքը մատնանշում է հոգևորականի «ստոր» արարքը:

Շիրակի թեմի առաջնորդի խոսքով՝ հարկ է, որ բոլորն իմանան, որ զոհված զինվորն ունի իր դավանական պատկանելիությունը: «Կարող է լինել առաքելական, կարող է լինել կաթոլիկ, ավետարանական կամ նաև աթեիստ, հիմա եթե մկրտված չէ, առաջարկել ենք հուղարկավորել քաղաքացիական ծեսով, ի՞նչ կա սրա մեջ անբարոյական, ես անբարոյական բա՞ն եմ ասել»,- ասաց նա և նշեց, թե խնդիրը նրանում է, որ ճիշտը չեն ուզում հասկանալ հարցը շահարկողները: «Որովհետև ճիշտն ընկալելու ցանկություն չունեն, որովհետև հոգևորական են տեսնում դիվահարվում են ոմանք, այն էլ այս Մեծ պահքի շրջանում»,-ասաց նա:

Դիտարկմանը, թե հետագայում փաստորեն պարզվել է, որ զինծառայող մկրտված է եղել, և փոքր հասակում, երբ խմբերով մկրտություն էր արվում, Գյումրու քաղաքապետ Սամվել Բալասանյանի կնքահայրությամբ նա էլ է կնքվել, սրբազանը հերքեց. «Ոչ, մկրտված չէ, վերջում հորինեցին, որ մկրտված է: Բայց քահանային այդքանով հանդերձ հանձնարարվել է կարգը կատարել, զուտ կրքերը հանդարտեցնելու համար, ոչ թե որովհետև այդպես ճիշտ էր, զուտ հովվական նկատառումներով, ավելորդ կրքերը հանդերտեցնելու համար քահանաներին հանձնարարված էր հոգևոր ծիսակատարությամբ հուղարկավորվել, բայց չմկտրված մարդուն հուղարկավորում են քաղաքացիական ծեսով, ոչ թե արգելում են եկեղեցի մտնել, դրանք տարբեր հարթություններ են: Դա եկեղեցական օրենք է, ես չեմ գրել»,-ասաց նա:

Ի պատասխան դիտարկմանը, որ եկեղեցուն քննադատում են նրա համար, որ քահանաները գումարով թաղման ծես են կատարում չմկրտված տարիքով մարդկանց, ովքեր ապրել է խորհրդային տարիներին և կնքված չեն եղել, Աջապահյանը նշեց. «Երբ են տեսել, որ ես թողել եմ տարիքով չմկրտվածներին եկեղեցական արարողակարգով թաղեն, որտեղ են տեսել, ձեռքս բռնել, չի կարող լինել»:

Դիտարկմանը թե ձեզ նկատի չունեն, այլ ընդհանրապես քահանաններին, Շիրակի թեմի առաջնորդն ասաց. «Ամեն քահանայի արածի կամ չարածի համար ես պատասխանատո՞ւ եմ»: Հարցին, թե այսինքն՝ չի՞ հերքում, որ հնարավոր է, պատասխանեց. «Անշուշտ, սովետական տարիների վերջում, անշուշտ, չէին խորանում, որովհետև սովետական տարիներին մարդը մկրտված չէր, բայց այս երիտասարդը 1998-ին է ծնվել ազատ, անկախ Հայաստանի պայմաններում, գործող եկեղեցու պայմաներում մեծացել է ... գուցե աթեիստ է եղել մարդը, գուցե իրեն վիրավորում ես եկեղեցի տանելով, էդ ո՞ր աթեիստը կուզի եկեղեցում թաղվել»:

Հարցին, թե հաշվի առնելով հարազատների պնդումը, որ զինծառայողը հուղարկավորվի եկեղեցական կարգով, արդյոք չի հուշում է, որ եկեղեցու նկատմամբ հավատ ունեն և արդյոք չեն տեսնում բուն եկեղեցու մեղքը, որ այդ մարդիկ տեղյակ չեն եղել, թե ինչքանով է կարևոր մկրտությունը, Միքայել եպիսկոպոս Աջապահյանը պատասխանեց. «Նախ եթե եկեղեցու նկատմամբ հավատ ունենային 20 տարին բավարար չէ՞ր այդ երեխային մկրտելու համար: Եվ հետո, ինչո՞վ է մեղավոր եկեղեցին, ես 19 տարի ասում եմ՝ Ձեզ զավակներին մկրտե՛ք, ձեր զավակներին մկրտե՛ք, չե՛ն մկրտում»: