Հարկային ստվերի ռիսկերի նվազեցման խնդիրներ կան. Վարչապետը լուծումներ է պահանջում
2017 թվականին պետական բյուջեի եկամուտները նախորդ տարվա համեմատ ավելացել են 125 մլրդ դոլարով. այդուհանդերձ, դեռևս խնդիրներ կան հարկային ստվերի նվազեցման, օրենսդրական ոչ հստակ կարգավորումների հետևանքով հարկերի վճարումից խուսափելու կամ արհեստական նվազեցնելու, ինչպես նաև հարկային արտոնությունների հստակության և նպատակային օգտագործման հարցերում: Այս մասին, այսօր՝ փետրվարի 22-ին, Կառավարության նիստում նշեց ՀՀ վարչապետ կարեն Կարապետյանը:
Նրա խոսքով, ՊԵԿ-ի կողմից վերջերս կազմակերպվել են տարբեր ոլորտների շուրջ 500 հարկ վճարողների հետ հանդիպումներ և կատարվել են ուսումնասիրություններ. «Արդյունքում պարզվել է, որ արձանագրված խնդիրների լուծումները, այդ թվում հարկային ստվերի վերաբերյալ, գտնվում են նաև մի շարք գործադիր մարմինների իրավասությունների տիրույթում»:
Վարչապետը հանձնարարեց ՊԵԿ-ի նախագահ Վարդան Հարությունյանին 7-օրյա ժամկետում ուսումնասիրությունների արդյունքում արձանագրված խնդիրները ըստ ոլորտների փոխանցել հանրապետական գործադիր մարմինների ղեկավարներին՝ ներկայացնելով դրանց հնարավոր լուծման առաջարկություններ:
Նա կառավարության աշխատակազմի ղեկավարին հանձնարարեց 10-օրյա ժամկետում մշակել և ներկայացնել միջգերատեսչական աշխատանքային խումբ ստեղծելու վերաբերյալ որոշման նախագիծ՝ հստակ սահմանելով, որ խումբը սեղմ ժամկետներում կառավարության աշխատակազմ կներկայացնի օրինապահ հարկ վճարողների վարչարարության մեղմացման, հարկային ստվերի ռիսկերի նվազեցման, դրան նպաստող մեխանիզմների վերացման և ոչ հստակ կարգավորումների շտկման, արտոնությունների հստակեցման, ինչպես նաև վեր հանված ոլորտային ու համակարգային խնդիրների լուծումների վերաբերյալ առաջարկություններ:
«Բոլոր լուծումները, որ այդ աշխատանքային խումբը ներկայացնելու է, համար առաջին պայմանը օրինապահ հարկ վճարողների կյանքը հեշտացնելն է»,-աընդգծեց Կարեն Կարապետյանը: