2018-ին 20 նախակրթարանի համար՝ մոտ 500 երեխայի ընդգրկմամբ, կներդրվի 235 հազար դոլարին համարժեք դրամ. Լևոն Մկրտչյան

Կրթության և գիտության նախարար Լևոն Մկրտչյանը, ամփոփելով ԿԳՆ-ի՝ 2017 թվականի գործունեությունը, հիշեցրեց, որ կրթության համակարգում աշխատում են մարզպետարանները, քաղաքապետարանը, համալսարանները, որոնք պատասխանատու են կրթական համակարգի համար:

Անդրադառնալով հանրակրթության ոլորտին՝ նախարարն ընդգծեց, որ այնտեղ ամենակարևոր և շոշափելի հարցը նախակրթարանների հիմնման ծրագիրն է:

«Կարողացանք փոփոխել նախադպրոցական հաստատությունների իրավական փաթեթը մի քանի ուղղությամբ՝ կառավարման համակարգ, պայմանագրային բազա, և, իհարկե, շատ արդյունավետ շարունակում ենք մեր նախակրթարանների ծրագիրը»,- ասաց Լևոն Մկրտչյանը:

Նրա տեղեկացմամբ՝ 2017 թվականին Համաշխարհային բանկի աջակցությամբ իրականացվել է 27 միկրոծրագիր, և ՀՀ մարզերի 23 ուսումնական հաստատությունում ընդգրկված շուրջ 450 երեխա հնարավորություն է ունեցել հաճախել նախակրթարաններ: Վերապատրաստվել է 46 դաստիարակ: «Ներդրումների ծավալն անցյալ տարի եղել է 248 հազար դոլարին համարժեք դրամ, հաջորդ տարի ևս, 20 նախակրթարանի համար՝ մոտ 500 երեխայի ընդգրկմամբ, կներդրվի 235 հազար դոլարին համարժեք գումար»:

Նախարարի հավաստիացմամբ՝ մյուս կարևոր մեծ ծրագիրը ներառական ծրագիրն է: Ըստ նրա՝ այս ոլորտում կան կուտակված հիմնախնդիրներ, ծրագիրն աշխատում է և մինչև 2022 թ. պետք է ՀՀ-ն ամբողջությամբ անցնի ներառական կրթության՝ օրենսդրական պահանջ է:

«2017 թ. 4 հատուկ դպրոց վերակազմավորվել է մանկավարժահոգեբանական աջակցության կենտրոնների, և հանրակրթական դպրոցներ է տեղափոխվել 172 երեխա: Շատ կարևոր մեկ այլ փոփոխություն եղավ այս ոլորտում, դպրոցներում սկսեց աշխատել «ուսուցչի օգնական» հաստիքը: 8300 հատուկ կարիքներով աշակերտների կրթության կազմակերպման աջակցության նպատակով աշխատանքի է անցել 520 ուսուցչի օգնական: Ներկայումս ներառական կրթություն իրականացվում է Լոռու, Տավուշի, Սյունիքի մարզերում, 2018 թ. ներառական կրթության են անցնելու նաև Արմավիրի մարզում, այնուհետև նախապատրաստվելու ենք նաև Երևանի դպրոցներում համալիր փոփոխությանը»:

Լևոն Մկրտչյանի գնահատմամբ՝ այս ոլորտում կուտակված խնդիրներ կան: ԿԳՆ-ը համալիր ուսումնասիրություն է կատարում հատուկ կրթության հաստատությունների վիճակի վերաբերյալ: Չի թույլատրվելու, որ հաշմանդամություն ունեցող երեխայի անվան տակ իրականացվեն բոլորովին այլ նպատակներ հետապնդող ծրագրեր:

«Այստեղ մի քիչ ռիսկայնությունը մեծանում է այն առումով, որ մեկ աշակերտի հաշվով ֆինանսավորումն այս դեպքում բազմապատիկ բարձր է, և հաճախ հատուկ կրթության հաստատություններում նկատվում են կեղծ ամրագրումներ կամ հաշմանդամություն չունեցող սոցիալապես այլ հատվածի ներգրավում: Շատ լավ ծրագիր է»,- վստահեցրել է նախարարը: