Իսրայելի՝ Ադրբեջանին զենք վաճառելու փաստը քննարկվել է ԱԺ պատգամավորների և Իսրաելի պատվիրակության անդամների միջև

Փետրվարի 11-15-ը Իսրայելի Կնեսեթի փոխխոսնակ, Իսրայել-Հայաստան բարեկամական խմբի ղեկավար Թալի Պլոսկովի հրավերով Իսրայելում էր ՀՀ Ազգային ժողովի Հայաստան-Իսրայել բարեկամական խումբը՝ Գագիկ Մինասյանի ղեկավարությամբ: Փետրվարի 16-ին հրավիրված մամուլի ասուլիսում խմբի ղեկավարն ու անդամներ Գագիկ Մելիքյանը, Աղվան Վարդանյանը, Վահե Էնֆիաջյանը և Գևորգ Գորգիսյանը մանրամասներ են ներկայացրել այցի վերաբերյալ:

Գագիկ Մինասյանը տեղեկացրել է, որ այցը բավականին հագեցած է եղել, տեղի են ունեցել մի շարք աշխատանքային հանդիպումներ խորհրդարանում, կառավարությունում: Խորհրդարանական պատվիրակությունը հանդիպել է նաև հայ համայնքի ներկայացուցիչների հետ, այցելել Հայոց Պատրիարքարան:

Հանդիպումների ընթացքում քննարկվել են մասնավորապես Լեռնային Ղարաբաղի հակամարտության կարգավորմանը, Հայոց ցեղասպանության ճանաչմանը և տարածաշրջանին վերաբերող հարցեր:

Հայկական կողմը հույս է հայտնել, որ ԼՂ հիմնախնդրի կարգավորման հարցին Իսրայելը՝ որպես եվրոպական արժեքներ կրող երկիր, կմոտենա նույն սկզբունքներով, ինչ ԵԱՀԿ Մինսկի խումբը:

ՀՀ ԱԺ պատգամավորներն անհասկանալի են համարել այն հանգամանքը, որ Իսրայելը զենք է մատակարարում Ադրբեջանի նման բռնապետական մի պետության, որի ղեկավարն իր վերջին հայտարարություններով հավասարվեց նացիստական Գերմանիայի առաջնորդներին:

Պատվիրակության անդամները հանդիպումների ժամանակ կարևորել են տնտեսության, բարձր տեխնոլոգիաների, զբոսաշրջության, գյուղատնտեսության, մշակույթի ոլորտներում կապերի զարգացման անհրաժեշտությունը, երկու ժողովուրդների միջև շփումների խորացումը:

Գևորգ Գորգիսյանի խոսքով` Հայաստանը հետաքրքրում է հրեա ժողովրդին, և այս տարի ակնկալվում է զբոսաշրջիկների` մեր երկիր այցելությունների թվի ավելացում:

Հանդիպումների ընթացքում կողմերը կարևորել են տնտեսության տարբեր ոլորտներում համագործակցության հեռանկարները: Ըստ Գագիկ Մելիքյանի՝ Իսրայելը բավականին հետաքրքված է ԵԱՏՄ շրջանակում ազատ տնտեսական գոտու ստեղծմանը մասնակից լինելու հարցով:

Վահե Էնֆիաջյանը նշել է, որ քննարկվել են էկոլոգիական, բնապահպանական և գյուղատնտեսական բնագավառներում փոխգործակցությանը վերաբերող հարցեր:

Աղվան Վարդանյանը տեղեկացրել է, որ ձեռք է բերվել նախնական պայմանավորվածություն Հայաստան-Իսրայել բիզնես-համաժողով կազմակերպելու վերաբերյալ: