на Русском
Հատուկ զբոսայգիներ՝ շների համար
Բեյոնսեն ծաղկեփունջ է ուղարկել իր երկու տարեկ... 
Հայ-թուրքական հարաբերությունների կարգավորումն այսօր չի կարող լինել, կողմերը դրան պատրաստ չեն. Կարո Փայլան
Թուրքիայի մեջլիսի Ժողովրդադեմոկրատական կուսակցության պատգամավոր Կարո Փայլանի խոսքով՝ հայ-թուրքական հարաբերությունները կարգավորելու համար նոր թուղթ է պետք, պետք են նոր արձանագրություններ: Բայց դրա համար, ըստ նրա, պետք է նոր Թուրքիա՝ դեմոկրատ Թուրքիա, ինչպես նաև այն, որ Հայաստանն էլ դեմոկրատ լինի:
Նա Tert.am-ի հետ զրույցում հիշատակեց, որ սեպտեմբերին, երբ այստեղ էր Հայաստան-Սփյուռք համաժողովին մասնակցելու, հանդիպել է արտաքին գործերի նախարարի հետ, քննարկել հայ-թուրքական հարաբերությունների կարգավորման գործընթացի հնարավոր վերսկսման թեման: Պատմեց, որ հետո, երբ վերադարձել է Թուրքիա, խոսել է այնտեղի պատկան մարմինների՝ վարչապետի, արտգործնախարարի և այլ նախարարների հետ, թեման նրանց հետ էլ է քննարկել:
«Հարցը նրանց օրակարգում է, գոնե նրանց մտքում, բայց, կարծում եմ, որ ոչ ոք չի կարող նման գործընթաց սկսել, քանի դեռ երկրներում ազգայնականություն կա:
Այդ իսկ պատճառով մենք նախևառաջ պետք է կանգնեցնենք այս պատերազմը: Հիմա կողմերը դեռ պատրաստ չեն նման գործընթաց սկսելու»,- նշեց նա:
Պոլսահայ պատգամավորը նաև նկատեց՝ ցավոք սրտի, ազգայնականություն կա ամենուր: «Այն կա Թուրքիայում, կա Ադրբեջանում և, ցավոք սրտի, կա նաև Հայաստանում: Բոլոր ազգայնականները միմյանց ուժ են տալիս: Դա հաշվի առնելով՝ մենք նախ պետք է այս իրավիճակը, մթնոլորտը փոխենք»,- ասաց նա:
Կարո Փայլանի խոսքով՝ ցավոք սրտի, հիմա Թուրքիայում ամեն ինչ օրեցօր ավելի վատն է դառնում: «Երբ նոր բաներ լինեն, վստահ եմ, որ քայլեր կձեռնարկվեն նաև հայ-թուրքական հարաբերությունների, ղարաբաղյան հիմնախնդրի կարգավորման ուղղությամբ: Բայց դա, դժբախտաբար, չի կարող լինել այսօր»,- ասաց նա՝ հավելելով, որ իրավիճակն այսօր ավելի վատն է, քան երեկ:
Պոլսահայ պատգամավորը նշեց՝ իրավիճակը փոխելու համար նախևառաջ պետք է կանգնեցնեք պատերազմը, նոր Թուրքիային հանդիպենք, նոր արդեն մի այլ գարնան սկսենք հայ-թուրքական հարաբերությունների կարգավորման գործընթացը:
«Ես չեմ կարծում, որ հենց այս պահին հնարավոր է ինչ-որ քայլ ձեռնարկել հայ-թուրքական հարաբերությունների կարգավորումը վերսկսելու համար»,-նշեց նա:
Հիշեցնենք, որ սեպտեմբերին Հայաստան-Սփյուռք համաժողովին մասնակցելու համար Երևան եկած Կարո Փայլանը լրագրողների հետ զրույցում բազմիցս նշել էր, որ ցանկանում է կամուրջ դառնալ Հայաստանի և Թուրքիայի միջև: Նա նաև հայտնել էր, որ երբ գնա Թուրքիա, կխոսի այնտեղի իշխանությունների հետ հայ-թուրքական հարաբերությունների կարգավորման վերաբերյալ:
