Այս դահլիճում բոլորիս նպատակը մեկն է՝ քայլեր ձեռնարկել, որ գնաճն ունենա հնարավորինս քիչ բացասական ազդեցություն. Շարմազանով

Այս դահլիճում բոլորիս նպատակը մեկն է՝ քայլեր ձեռնարկել, որ գնաճն ունենա հնարավորինս քիչ բացասական ազդեցություն, քան կարող է ունենալ. ԱԺ արտահերթ նիստին «Ելք» խմբակցության հեղինակած «ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագծի քննարկմանը ասաց ԱԺ փոխնախագահ Էդուարդ Շարմազանովը:

Ըստ նրա՝ բնական է, որ ընդդիմությունը քննադատում է, իսկ իշխանությունն էլ փորձում է ներկայացնել իր կարծիքների ճշմարտացիությունը:

ՀՀԿ-ական պատգամավորը հիշեցրեց, որ այս հարցն ավելի վաղ քննարկվել է նաև լսումներին, հանձնաժողովների նիստերում:

«Լսումների արդյունքում հանգեցինք երկու կարևոր քայլի` ՀՀ նախագահի առաջարկով գյուղնախարարը հայտարարեց, որ պատրաստ են սուբսիդավորել գյուղացիական տնտեսությունների դիզվառելիքի գումարը: Այստեղ մեկ խնդիր կա, որ այդ գումարը հասցեական լինի, ճանապարհին չփոշիանա»,-ասաց նա՝ կարևորելով պառլամենտական վերահսկողությունը:

Շարմազանովը տեղեկացրեց, որ բացի այդ, ՀՀԿ-ական պատգամավոր Խոսրով Հարությունյանի նախաձեռնությամբ ընդունվել է մի օրենք, որը պակասեցրել է տրանսպորտային դրույքաչափերը, ինչը դրական է ազդում այս ոլորտում աշխատողների վրա:

«Այստեղ մի հարց կա՝ արհեստական գնանկում պե՞տք է անենք. ամեն գնով գնանկումը շատ վատ երևույթ է, պետք է ապահովել ավելի մեծ տնտեսական աճ, քան գնաճն է, ինչը հաջողվում է, սակայն բավարար չէ»,-նկատեց նա:

Ըստ ԱԺ փոխնախագահի՝ Հայաստանն ԱՊՀ երկրների մեջ ամենաբարձր տնտեսական ակտիվությունն ու աճն ունի, ինչն էլի բավարար չէ, սակայն սա պետք է արձանագրել:

«Տարածաշրջանում ամենաքիչ գնաճը մերն է: Մենք պիտի ամեն ինչ անենք, որ տնտեսական աճն ավելի բարձր լինի, քան գնաճը»,-ասաց նա: