«Իգլա»-ն Վրաստանից չի բերվել, խաբել էի, որ թանկ վաճառեմ. պատերազմի ժամանակվանից մնացել էր մեր տանը

Վերաքննիչ դատարանում շարունակվում է Կենտրոն և Նորք Մարաշ վարչական շրջանների ընդհանուր իրավասության առաջին ատյանի դատարանի կողմից վեց տարի ազատազրկման դատապարտված Արցախի հերոս Սամվել Բաբայանի և «Իգլա»-ի գործով ևս երկուսի՝ Արմեն Պողոսյանի և Սանասար Գաբրիելյանի վերաքննիչ բողոքների քննությունը:

Մեղադրանքը պաշտպանում է դատախազ Արամ Արամյանը։

Նախորդ դատական նիստին վերաքննիչ դատարանը բավարարել էր Սամվել Բաբայանի ու նրա պաշտպան Ավետիս Քալաշյանի պաշտպանի միջնորդությունը և դատարան հարցաքննության է հրավիրել գործի անջատված մասով մեղադրյալ Ռոբերտ Աղվանյանին, ով «Իգլա»-ի գործով ձերբակալվել, այնուհետև կալանավորվել էր Վրաստանում և ինն ամիս անց հանձնվել Հայաստանին։

Այսօրվա նիստին Սամվել Բաբայանի պաշտպանը հարցրեց, թե որտեղից է ձեռք բերել «Իգլա»-ն, Աղվանյանը պատասխանեց.«Պատերազմի ժամանակ հայրս մեծ օգնություն է ցուցաբերել,այդ ժամանակվանից մնացել էր մեր տանը։ 2010 թվականին Էջմիածինում տունս վաճառելու ժամանակ եմ հայտնաբերել»։

Քալաշյանի հարցին, թե 2017-ին, ըստ գործի նյութերի՝ Թբիլիսիում փնտրել և հանդիպել է Հրաչ Մայիլյանի հետ, ի՞նչ են զրուցել, Աղվանյանն ասաց.«Չեմ փնտրել,պատահական հանդիպել ենք, հաց ենք կերել, զրուցել ենք։ Ես «Իգլա»-ն տվել եմ Հրաչյա Մայիլյանին, իմ գործունեությունն այդքանն է, մնացած հարցերով Հրաչյա Մայիլյանին դիմեք»։

Հարցաքննության ժամանակ Ռոբերտ Աղվանյանն ասաց՝ որպեսզի զենիթահրթիռային համակարգը ավելի բարձր գնով վաճառվի, ասել է, որ այն բերելու է Վրաստանից, չի հայտնել,որ դա գտնվում է իր տանը։

Աղվանյանն ասաց,որ ամբաստանյալներից Սամվել Բաբայանին և Սանասար Գաբրիելյանին չի ճանաչում, Արմեն Պողոսյանին էլ ճանաչում է որպես Էջմիածինցի։

«Զենիթահրթիռային համալիր Վրաստանից չի բերվել,այլապես ինձ Վրաստանից Հայաստան չէին արտահանձնի։ Զենքը տվել եմ Մայիլյանին, նպատակ եմ ունեցել այն վաճառել 25000 դոլարով, Հրաչյա Մայիլյանն էլ ինձ տվել էր 4000 դոլար»։

Քալաշյանի հարցին, թե ինչու է այդ գումարի դիմաց զենքը թողել Մայիլյանի մոտ, Աղվանյանն ասաց, որ Մայիլյանը խոստացել է մնացած գումարը հետո տալ։

Ամբաստանյալ Սանասար Գաբրիելյանի հարցին,թե Աղվանյանն է առաջարկել զենքը վաճառել, թե իրեն դիմել են, ասաց, որ ինքը հանդիպել է ազգությամբ եզդի Ռոստամի հետ և ասել, որ նման զենք ունի.

«Ասացի՝ կարող է եզդիներին պետք գա թուրքերի դեմ օգտագործելու համար»։

Հարցաքննվելու ընթացքում Աղվանյանը նաև հայտնեց, որ այդ հրթիռից ևս մեկն էլ ունեցել է, որը կալանավորվելուց հետո 2017-ին նվիրաբերել է հայոց բանակին։

Դատավորն արձագանքեց.«Դե սաղ նվիրեիք պրծնեիք»։

Սամվել Բաբայանն էլ հարցաքննվողին ասաց,որ ինքը տեղյակ է եղել,որ մեկ համալիր Աղվանյանը նվիրել է բանակին, և տեղյակ է, որ այդ համալիրը Աղվանյանենց տանը գտնվել է ոչ թե 2010-ից, այլ ավելի վաղ՝ 1990-ականներից։

Հարցաքննության ավարտից հետո Սանասար Գաբրիելյանն ասաց. «Ուրախալի է, տեսա՞ք, որ ճիշտ ենք ասում,պարո՛ն դատավոր»։

Հիշեցնենք, որ դատապարտյալ Սամվել Բաբայանը առաջին ատյանի դատարանի կողմից մեղավոր է ճանաչվել Քրեական օրենսգրքի 38-235-րդ հոդվածի 2-րդ մասի և 190-րդ հոդվածի 1-ին մասի հատկանիշներով և դատապարտվել ազատազրկման 6 տարի ժամկետով:

Նա պահանջում է արդարացնել իրեն՝ արդարացման դատական ակտ կայացնել հանցակազմի բացակայության պատճառաբանությամբ:

Դատապարտյալ Սանասար Գաբրիելյանը, ով մեղավոր է ճանաչվել ՀՀ ՔՕ-ի 235-րդ հոդվածի 2-րդ մասի հատկանիշներով և դատապարտվել 3 տարի ազատազրկման, պահանջում է իրեն անպարտ ճանաչել:

2 տարվա ազատազրկման դատապարտված Արմեն Պողոսյանը պահանջում է բեկանել առաջին ատյանի դատարանի կայացրած դատավճիռն ու կայացնել արդարացման որոշում:

Նշենք, որ գործով անցնում էին ևս չորս ամբաստանյալ: Առաջին ատյանի դատարանը Կարեն Քոչարյանին, Անդրանիկ Քոչարյանին, Ժորա Զաքարյանին և Դավիթ Հարությունյանին մեղավոր էր ճանաչել ՀՀ ՔՕ-ի 38-190-րդ հոդվածի 1-ին մասի հատկանիշներով նախատեսված արարք կատարելու համար: Նրանց պատիժը պայմանականորեն չի կիրառվի: