Ասում եք՝ եկեք գնաճին դիմագրավենք` խոցելի խավին աջակցելով. ինչո՞վ եք աջակցում, 1000 դրամ տալո՞վ. Վարդան Բոստանջյանը՝ Խոսրով Հարությունյանին
ԱԺ արտահերթ նիստին «Ելք» խմբակցության կողմից հեղինակված «ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագծի քննարկմանը «Ծառուկյան» խմբակցության պատգամավոր Վարդան Բոստանջյանը, դիմելով ԱԺ տնտեսական հանձնաժողովի նախագահ Խոսրով Հարությունյանին, հետաքրքրվեց, թե իշխանությունը, եթե չի ցանկանում նախագծին ընդառաջ գնալ, այդ դեպքում ինչ է առաջարկում գնաճին դիմագրավելու համար:
«Ձեր ելույթից որքան հասկացա, ներկայացված նախագծին դրական չեք վերաբերվում: Փաշինյանն ուզում էր ապացուցել, որ գնաճը 21,9% է, ինձ բոլորդ էլ ճանաչում եք՝ զուսպ ու չափագրված սպառող եմ, բայց կարծում եմ, որ գնաճը 40 և ավելի տոկոս է: Ինչևիցե, դրա մասին չէ խոսքը, ի՞նչ եք առաջարկում, ասում եք՝ եկեք դիմագրավենք, բայց ասում եք, ով որ մեքենա ունի, որը 700-1000 դոլարով է առել, բարձր ակցիզային հարկով շարունակի աշխատել»,- ասաց նա:
Բոստանջյանը նշեց, թե միաժամանակ ասում են, որ սոցիալական խոցելի խավին եկեք աջակցենք: «Ինչո՞վ աջակցեք, 1000 դրա՞մ տաք աշխարհի ամենաողորմելի ինստիտուտին, մարդուն ստրուկ դարձելու համա՞ր: Մարդու համար աշխատատեղ ստեղծելու, հնարավորություն ընձեռելու փոխարեն ասում եք՝ արեք աջակցենք, աջակցությունն էլ վերջանում է 1000 դրամի շրջանակում: Հիմա ի՞նչ անենք՝ այս վիճակից դուրս գանք: Կարելի է սենց ժողովրդին սպանելով բերել՝ իբր թե բյուջեն լցնել ու էլի նորից ռացիոնալ չօգտագործել»,- ասաց նա:
Խոսրով Հարությունյանն արձագանքեց, թե գնաճը 40 տոկոս ասելով՝ վիճակն ավելի է վատթարացնում: Ըստ Հարությունյանի՝ իրականում պետք է առաջնորդվեն ընդամենը պարենային զամբյուղում ներառված 11 անուն ապրանքների գնաճով, որը կազմում է 5,8 %, և դրանից ելնելով փոխհատուցելու խնդիր դնեն:
Իսկ թե ինչ անել, Խոսրով Հարությունյանի խոսքով՝ այդ խնդիրը կարճաժամկետ լուծում չունի: «Միակ լուծումը տնտեսության աճն է»,- ասաց նա և հիշեցրեց, թե 18թ-ի բյուջեով պայմանավորվել են, որ չեն գնա պարտք վերցնեն՝ սոցիալական ծախսերը հոգալու համար: «Եթե պարտք, ուրեմն՝ բացառապես կապիտալ ծախսերի համար»,-ասաց նա:
Պատասխանը Բոստանջյանի դուրը եկավ. «Հիմա իսկապես դուրս եկավ այս պատասխանը, այո՛, կարճաժամկետ պրոցես չէ»: