Ի՞նչ սեռական բռնություն, դուք այնտեղ նման բան տեսե՞լ եք. Շարմազանովը՝ Ավագանու նիստի ծեծկռտուքի մասին

ՀՀԿ գործադիր մարմնի նիստից հետո լրագրողները ԱԺ նախագահի տեղակալ, ՀՀԿ խոսնակ Էդուարդ Շարմազանովին խնդրեցին անդրադառնալ նաև Երևանի քաղաքապետարանում տեղի ունեցած ծեծկռտուքի միջադեպին: «ՀՀԿ-ն, բնականաբար, ոչ քաղաքակիրթ, ոչ կոռեկտ, ոչ էթիկայի սահմաններում ցանկացած արարք ու բռնություն անթույլատրելի է համարում: Մենք չենք կարող նման պահվածքը խրախուսել, միևնույն ժամանակ, խնդիրը գտնվում է իրավապահների տիրույթում ու ես չեմ ուզում որևէ մեկնաբանություն անել այնտեղ բռնություն եղել է կամ չի եղել, որ կողմն է բռնության ենթարկել, որ կողմն է բռնության ենթարկվել: Ինձ համար տարօրինակ են սեռական բռնության մասին ելույթները, որովհետև չի կարելի ամեն ինչ փորձել արդարացնել, հասուն մարդիկ ենք, ես գոնե հետևել եմ ու տեսել եմ տեսանյութը, այնտեղ որևէ սեռական բռնություն չեմ նկատել»,-ասաց նա:

ԱԺ փոխնախագահը միաժամանակ նշեց, թե «Երկիր ծիրանիի» պահվածքը ևս համարում է ոչ քաղաքակիրթ, ոչ քաղաքական, ոչ էլ էթիկայի նորմերին համապատասխան: «Երևանի քաղաքապետարանը ախոռագոմ չէ, և այստեղ ես համամիտ եմ թե՛ Անահիտ Բախշյանի հետ, որը նշեց, որ դժվար է պատկերացնել, որ երեք կին նման ձևով իրենց կպահեին, և համամիտ եմ Դավիթ Խաժակյանի այն կարծիքի հետ, որ նշեց նիստի ժամանակ, որ ինքը կողմ է խոսքի ազատությանը, բայց այն, ինչ տեղի ունեցավ, դա չափերի անցում էր»,-ասաց նա և հավելեց, թե խնդիրն իրավական սահմաներում է, կան երկուստեք բողոքներ:

Ըստ նրա՝ անընդունելի է այն մարդկանց կարծիքը, որ իշխանություններին քննադատելու համար ամեն կերպ արդարացնում են ոչ քաղաքկիրթ ու կոռեկտ պահվածը, որը ցույց տվեցիքն Զարուհի Փոստանջյանը և կուսակիցները: «Իշխանությունն այնքան թերություն ունի, դրա համար մեզ քննադատեք, բայց չի կարելի ամեն ինչ արդարացնել, ի՞նչ սեռական բռնություն, դուք այնտեղ սեռական բռնություն տեսե՞լ եք»,-ասաց նա: