Մեզ մոտ եկամուտների բաշխման ամենաարդարացի համակարգը չի գործում, բայց մտածել, թե սպառման ծավալների ավելացումն ապահովում են մի քանի հարուստներ, առնվազն ծիծաղելի է. Խոսրով Հարությունյան

Կարծում եմ՝ ներդրումների իրական արտահայտության արձագանքը և՛ բնակչության կենսամակարդակի, և՛ տնտեսության վրա մենք կարող ենք զգալ 2018-2019 թթ-ի ընթացքում:

Tert.am-ի հետ զրույցում նման տեսակետ հայտնեց ՀՀ ազգային ժողովի տնտեսական հարցերի մշտական հանձնաժողովի նախագահ Խոսրով Հարությունյանը՝ անդրադառնալով վարչապետ Կարեն Կարապետյանի հայտարարությանը, թե իր կողմից խոստացված 856 մլն դոլարի ներդրումն ապահովել են, որից 540 մլն-ը միայն մասնավոր հատվածից է եղել:

Հարությունյանը համաձայն չէ այն դիտարկման հետ, թե ինչպես է, որ նման ծավալների ներդրման պարագայում բնակչության կենսամակարդակը չի բարելավվում, աշխատավարձ, թոշակ չի բարձրանում, զուգահեռ գնաճ է արձանագրվում: Ըստ նրա՝ ընթացիկ վիճակագրական տվյալներով փորձել մեկնաբանել՝ արդյոք կենսամակարդակի աճ ունենք, թե ոչ, բավարար չէ:

«Մենք մի քիչ շփոթում ենք, երբ ասում ենք, որ ունենք 1 մլն-ի, կամ 80 մլն-ի ներդրում: Ես հասկանում եմ, որ սկսվել է մի նախագիծ, որի ներդրումային ամբողջ ծավալը կազմում է 850 մլն, բայց դա չի նշանակում, որ այդ ամբողջ ծավալը պետք է ներդրվի հենց մեկ տարվա ընթացքում: Հետևաբար, ես որքան կարողանում եմ գնահատել, խոսքը գնում է այդ ծավալի՝ 835 մլն դոլարի ներդրումային ծրագրերի մեկնարկի մասին, դրանք արդյունք կունենան, անկասկած ավարտված կլինեն: Բայց էական է, որ կան ծրագրեր, կան պոտենցիալ ներդրողներ, և մենք ունենք ակնկալիքներ արդյունքների վերաբերյալ»,-ասաց նա:

Հարցին, թե համաձայն է այն տեսակետների հետ, որ շարքային քաղաքացին իր վրա չի զգում աճի ազդեցությունը, որովհետև տնտեսական աճից ավելի շատ հարուստ խավն է լավ զգում, Խոսրով Հարությունյանը պատասխանեց.

«ՀՆԱ-ի աճի սպառման ծավալը շատ մեծ է: Մտածել, թե այդ սպառումն ապահովում են մի քանի հարուստներ, առնվազն ծիծաղելի է: Ես ընդունում եմ, որ մեզ մոտ եկամուտների, միգուցե ունեցվածքի բաշխման ամենաարդարացի համակարգը չի գործում, բայց ենթադրել, որ ՀՆԱ-ի աճը միայն հարուստներն են ապահովում, ես դա չեմ ընդունում»:

Մանրամասներն՝ այստեղ: