Սամվել Կարապետյանի օդանավը փոխադրել է նաև Սերժ Սարգսյանին (տեսանյութ)
Պարզվում է՝ գործարար Սամվել Կարապետյանի բիզնես դասի օդանավը ծառայություններ է մատուցել ոչ միայն վարչապետ Կարեն Կարապետյանին, այլև նախագահ Սերժ Սարգսյանին:
Այս փաստը ֆիքսել ենք մեր ընթերցողներից մեկի հուշումից հետո, ով հայտնեց, որ մեր նախորդ հրապարակման մեջ ներկայացված օդանավը տեսել է նախկինում, երբ հեռուստացույցով դիտել է Սերժ Սարգսյանի՝ Իրան կատարած այցի մասին ռեպորտաժը:
Այսպես՝ նախագահի կայքը 2017-ի հուլիսի 24-ին հայտնել է, որ «Սերժ Սարգսյանը մեկնել է կարճատև արձակուրդ, որի մի մասը կանցկացնի արտերկրում: Այդ ընթացքում Հանրապետության նախագահը կընդհատի արձակուրդը և աշխատանքային այցով կմեկնի Իրանի Իսլամական Հանրապետություն՝ մասնակցելու օգոստոսի 5-ին կայանալիք ԻԻՀ նորընտիր նախագահի երդման պաշտոնական արարողությանը»:
President.am-ում կարող ենք տեսնել Թեհրանում Սերժ Սարգսյանի պատվիրակության դիմավորման արարողության լուսանկարները, որոնցում հստակ երևում է գործարար Սամվել Կարապետյանի մասնավոր ինքնաթիռը՝ գրանցման 9H-SSK համարով:
Շեշտենք, որ անկախությունից ի վեր ՀՀ նախագահներն իրենց սպասարկող ինքնաթիռներ ունեն: Դրանց մասին «Հետքը» գրել է: 2007-ի վերջերից երկրի ղեկավարին, երբեմն՝ նաև այլ բարձրաստիճան պաշտոնյաների, սպասարկում է «Airbus A319-132» օդանավը, որը մինչև 2014 թ. կրում էր EK-RA01 քաղաքացիական գրանցման համարը, ապա դարձավ ռազմական բորտ՝ 701 համարի ներքո: Փաստորեն, Ս. Սարգսյանին Իրան է տեղափոխել ոչ թե նախագահական բորտը, այլ Հայաստանի խոշոր բիզնեսմեններից մեկի անձնական օդանավը:
Նախագահի աշխատակազմի ղեկավար Արմեն Գևորգյանից հետաքրքրվել էինք, թե ինչու է երկրի ղեկավարն օգտվել Հայաստանի խոշոր հարկատուներից մեկի՝ ՀԷՑ-ի սեփականատեր Սամվել Կարապետյանի օդանավի ծառայություններից, եթե ունի իր բորտը: Միաժամանակ հարցրել էինք, թե արդյոք գործարարի ինքնաթիռով է նաև Սարգսյանը մեկնել արտերկիր՝ հանգստի, ինչպես նաև վերադարձել Իրանից:
Մեր հարցմանը պատասխանել է նախագահի աշխատակազմի հասարակայնության և տեղեկատվության միջոցների հետ կապերի վարչության պետ Մերի Հարությունյանը: «2017 թ. օգոստոսի 5-ին Իրանի Իսլամական Հանրապետություն կատարած այցից առաջ և հետո Հանրապետության նախագահը գտնվել է արձակուրդում, որի մի մասն անցկացրել է արտերկրում,- հայտնել է Մ. Հարությունյանը, ապա հավելել,- նախագահ Սերժ Սարգսյանը արտերկիր մեկնել և Հայաստան է վերադարձել նախագահին սպասարկող ինքնաթիռով (խոսքը 701 բորտի մասին է- հեղ.): Արձակուրդում գտնվելու ընթացքում Հանրապետության նախագահին սպասարկող ինքնաթիռը տեխնիկական պատճառներով հնարավոր չի եղել շահագործել, ուստի Իրան մեկնելու համար օգտագործվել է այլ տրանսպորտային միջոց»:
Հարցրել էինք նաև, թե արդյոք նախագահի աշխատակազմը կամ այլ պետական մարմին պետբյուջեից վճարում է կատարել մատուցված ծառայության դիմաց: Շեշտենք՝ ոչ թե վճարի չափով էինք հետաքրքրվել, այլ վճարել-չվճարելու փաստով:
Մերի Հարությունյանը պատասխանել է. «Նկատի առնելով, որ «Գնումների մասին» ՀՀ օրենքի 15 հոդվածի 2-րդ մասը սահմանում է, որ «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքի 5 հոդվածի 2-րդ մասով նախատեսված պաշտոնատար անձանց (Հանրապետության նախագահի, ԱԺ նախագահի, վարչապետի) արարողակարգային ծախսերի, կեցության, սննդի և տրանսպորտային սպասարկման մասին տեղեկությունները, ներառյալ՝ տրանսպորտային միջոցների տեխնիկական սպասարկման և նորոգման ոլորտում ապահովման համար անհրաժեշտ ապրանքները, աշխատանքները և ծառայությունները, ի թիվս այլ տեղեկությունների, ներառվում են պետական գաղտնիք պարունակող գնումների պլանում՝ Ձեր կողմից հայցվող և օրենքի վերոնշյալ հոդվածի կարգավորման ներքո գտնվող այդ տեղեկությունները հրապարակման ենթակա չեն»:
Ինչպես կարելի է նկատել, նախագահականի վարչության պետը հղում է տվել «Գնումների մասին» օրենքին, ինչից պիտի ենթադրենք, որ Ս. Կարապետյանի օդանավի ծառայությունը գնվել է: Համենայն դեպս, այդպես բխում է Մ. Հարությունյանի պատասխանից: Իսկ իրականում տրամաբանական հարց է առաջանում. եթե վարչապետին այս ինքնաթիռն անվճար է փոխադրել, ինչը Կարեն Կարապետյանը չի հերքել, ինչո՞ւ պիտի երկրի ղեկավարին ծառայությունը մատուցվեր վճարի դիմաց (սա ասում ենք ոչ թե օրենքի տեսանկյունից, այլ միջանձնային հարաբերությունների):
Նախագահականին ուղղված գրության մեջ նաև նշել էինք, որ «Հանրային ծառայության մասին» օրենքի 23-րդ հոդվածով՝ հանրային ծառայողին և բարձրաստիճան պաշտոնատար անձին արգելվում է ծառայողական պարտականությունների առնչությամբ այլ անձանցից ստանալ նվերներ, գումարներ կամ ծառայություններ, ու հարցրել, թե արդյոք նախագահի կողմից գործարարի ինքնաթիռից օգտվելու փաստը չի հակասում օրենքին:
«Գնումների մասին» օրենքին հղում տալով՝ նախագահականը, փաստորեն, անուղղակի տվել է այդ հարցի պատասխանը, որը կարելի է այսպես ձևակերպել՝ ծառայությունը գնվել է, հետևաբար, խախտում չկա: Բայց եթե նույնիսկ ընդունենք, որ գնում է կատարվել, ապա հարց է ծագում, թե ինչպես է ընտրվել Ս. Կարապետյանի օդանավը (հիշեցնենք, որ այն շահագործում է Մալթայում գրանցված «Emperor Aviation» ընկերությունը, որը հիմնադրել է վրացի Իրակլի Լիտանիշվիլին), արդյոք հայտարարվել է մրցույթ, թե գնումն իրականացվել է առանց դրա՝ մեկ անձից (եթե այո, ապա ինչ հիմնավորմամբ): Փաստն այն է, որ նախագահի, ԱԺ նախագահի ու վարչապետի որոշ ծախսերի մասին վերոնշյալ օրենսդրական դրույթը գերազանց միջոց է նման գնումները հանրային վերահսկողությունից զերծ պահելու համար: