Հայաստանում անտառապահները կփոխարինվեն զինված ռեյնջերներով

Անցյալ տարի լայնամասշտաբ ուսումնասիրություններ են իրականացվել, որոնց արդյունքում «Հայանտառ»-ում բազմաթիվ խախտումներ են բացահայտվել: Այս մասին փետրվարի 13-ին լրագրողների հետ հանդիպման ժամանակ հայտարարեց «Հայանտառ» պետական ոչ առևտրային կազմակերպության տնօրենի առաջին տեղակալ Ռուբեն Պետրոսյանը:

Սակայն, նրա կարծիքով, բոլոր խնդիրները բխում են համակարգում առկա լուրջ բացթողումներից: «Եթե աշխատողը ցածր աշխատավարձով է աշխատում, ժամանակին աշխատանքից տուն գնալու համար տրանսպորտային միջոց չունի, իսկ նրա պարտականությունները շատ ավելի մեծ են, քան իրավունքները՝ հաշվի առնելով, որ նրան է վստահված 1500 հա տարածք, ապա ի՞նչ կարելի էր սպասել»,- նշեց Պետրոսյանը:

Ընդ որում, ինչպես նշեց ՊՈԱԿ-ի փոխտնօրենը, Հայաստանում անտառների պաշտպանության նոր համակարգ է ներդրվելու, որի դեպքում անտառապահները կփոխարինվեն ռենջերներով: Վերջիններս պատշաճ կերպով պատրաստված և զինված կլինեն, ինչպես նաև օժտված կլինեն ավելի լայն իրավունքներով: Այդպես, նրանք կկարողանան ուղղակիորեն միջամտել և կանխել որսագողերի և այլոց խախտումները՝ առգրավելով վերջիններից զենքը, մեքենաները և որսը: Ռեյնջերը նաև պետության կողմից սոցիալական պաշտպանվածություն կունենան և բարձր աշխատավարձեր, որոնք թույլ կտան նվազագույնի հասցնել կոռուպցիոն ռիսկերը:

Ըստ Ռուբեն Պետրոսյանի՝ վերջին ժամանակներս պետությունը լրջորեն սկսել է զբաղվել այս խնդրի լուծմամբ՝ մեծացնելով ծախսերը:

Իր հերթին ՀՀ բնապահպանության նախարարության բնապահպանության և բնական ռեսուրսների վարչության պետի տեղակալ Իգոր Սարգսյանն ընդգծել է, որ նման խնդիրները նախկինում ևս եղել են, սակայն պետությունը միջոցներ է ձեռնարկում հետագայում դրանք նվազեցնելու և կանխելու համար: