Իմ վերջնական որոշումը կլինի հանրապետության նախագահի հետ հաջորդ հանդիպմանը. Ա. Սարգսյանը՝ նախագահի թեկնածու լինելու առաջարկի մասին
Հանդիպումն օգտակար էր, ունեցանք բավականին բաց քննարկումներ. այս մասին լրագրողների հետ զրույցում ասաց ՀՀԿ-ի՝ ՀՀ նախագահի թեկնածու առաջադրված Արմեն Սարգսյանը՝ անդրադառնալով ՀԱԿ ներկայացուցիչների հետ հանդիպմանը:
«Հանդիպումն օգտակար էր: Ես, նախևառաջ, ուշադրությամբ լսեցի իրենց բոլոր փաստարկները և՛ ժողովրդավարության, և՛ տնտեսության, և՛ պետական կառույցի մասին, դրանից հետո ունեցանք բավականին բաց, կոնֆիդենցիալ քննարկումներ»,-ասաց Արմեն Սարգսյանը:
Նա նշեց, որ տարբեր հարցերի վերաբերյալ ՀԱԿ-ի հնչեցրած գնահատականները տարբերվում էին իր գնահատականներից:
«Կային հարցեր, որոնց վերաբերյալ մենք ընդհանուր տեսակետ ունենք և կարծում եմ, որ այս հարաբերությունները կշարունակվեն»,-ասաց Արմեն Սարգսյանը:
Իսկ Լևոն Տեր-Պետրոսյանի հետ հանդիպելու մասին հարցին ի պատասխան՝ Արմեն Սարգսյանն ասաց. «Ճիշտ կլինի նմանատիպ հանդիպման մասին խոսել, եթե ես առաջադրվեմ, եթե ընտրվեմ՝ գուցե դրանից հետո հաճույքով հանդիպեմ հանրապետության և՛ առաջին, և՛ երկրորդ նախագահներին»:
ՀՀ չորրորդ նախագահի լիազորությունների կրճատման վերաբերյալ հարցին ի պատասխան՝ Արմեն Սարգսյանն ասաց, որ օրենքների ձևավորման պրոցեսում ներդրում չունի:
«Ես ընդամենը ՀՀ քաղաքացի եմ և այս պահին ՀՀ դեսպանը՝ Մեծ Բրիտանիայում, ուրեմն ես ուշի ուշով հետևում եմ այդ բոլորին, բայց հանրապետության ապագա նախագահի աշխատանքին կամ գործունեությանը, անկախ այն բանից՝ ես կլինեմ, թե որևէ մեկը, ես վերաբերվում եմ ավելի լայն իմաստով, որովհետև կարելի է ղեկավարել կառավարելով և կարելի է ղեկավարել առաջնորդելով: Կառավարելու համար, բնական է, պետք է ունենանք լծակներ, իսկ առաջնորդելու համար կարելի է առաջնորդել գաղափարով, կարելի է առաջնորդել նաև ծրագրով, տեսլականով և այլն, բայց հանրապետության նախագահը կարող է ունենալ ոչ միայն այս բոլորը, այլ նաև ունի շատ մեծ լիազորությունների սահման այսօրվա Սահմանադրությամբ»:
Արմեն Սարգսյանն ասել է, որ առայժմ վերջնական որոշում չունի:
«Իմ վերջնական որոշումը կլինի հանրապետության նախագահի հետ հաջորդ հանդիպմանը»,-ասաց նա: