Մրցակցային բարձրագույն կրթություն չունենք, կրթության ոլորտում կտրուկ քայլերի անհրաժեշտություն կա, թեև կոռուպցիա չկա. Սերգո Երիցյան
Կրթությունն ունի դժվարություններ, ինչպես բոլոր ոլորտները: Այս մասին Tert.am-ի հետ զրույցում նշեց ՀՀ ԿԳՆ լեզվի պետական տեսչության պետ, ԿԳ նախկին նախարար Սերգո Երիցյանը` անդրադառնալով կրթության ոլորտի խնդիրներին:
«Մենք բարձրագույն կրթության հատվածում ունենք խնդիրներ ուսանողության մրցակցության պակասի պատճառով: Եթե մենք նախկինում ունեինք մրցակցային բարձրագույն կրթություն, ապա այսօր չունենք, քանի որ սկզբունքորեն ովքեր դիմում են, գրեթե բոլորն ընդունվում են բարձրագույն կրթական հաստատություններ, և եթե մրցակցային կրթություն գոյություն չունի, սա ազդեցություն է ունենում կրթության որակի վրա»,-ասաց նա:
Ըստ նրա`Բակալավրիատի կրթական համակարգը կայացել է և խնդիրներ կան հստակեցնելու մագիստրոսական կրթությունը, որը զուգակցումն ու զարգացումն է բակալավրիատի կրթությանը և ոչ թե պարզապես կրկնությունը կամ հավելումը:
«Համաձայն չեմ, որ մեզ մոտ լիովին մագիստրոսական կրթությունը բովանդակային առումով կայացել է իսկ ձևական առումով կայացել է: Դոկտորանտուրայի հատվածը մեզ մոտ զրոյական վիճակում է: Անցումները չեն կատարվում»,-ասաց նա:
Ինչ վերաբերում է կրթության համակարգում առկա կոռուպցիոն ռիսկերին, ապա Սերգո Երիցյանն ասաց.«Կրթության համակարգում այսօր կոռուպցիոն ռիսկերը, եթե նախկինում էլ ինչ-որ բան գոյություն է ունեցել, ապա զրոյացել է: Այսօր կոռուպցիան շատ քիչ է: Այսօրվա կրթական գնահատման համակարգը այնքան բաց է և թափանցիկ, որ կոռուպցիոն ռիսկերի որևէ հիմք չի ստեղծում: Չկա կոռուպցիա և վերջ»:
Նա նաև նշեց, որ գնահատման համակարգն այնքան ուսումնակենտրոն է, որ եթե ուսանողը հաճախեց դասերի, հանձնարարությունը կատարեց, ապա դասախոսը նույնիսկ ուզենա էլ անբավարար նշանակի, չի կարող: «Այսօրվա դասախոսը երեկվա դասախոսը չէ, որ հաշվի չառնի ընդհանրապես կուրսի կարծիքը, դիրքորոշումը: Այսօր ամեն ինչ բաց է բոլորիս առաջ»,-ասաց նա:
Կրթության նախկին նախարարը նշեց, որ դժվարություններ կան դասախոսական կազմում և այսօր երիտասարդ դասախոսներ չեն գալիս բուհ, ու մնացել է ամենաավագ սերունդը: Նա նշեց, որ դասախոսները չեն գալիս առաջին հերթին հաշվի առնելով ցածր աշխատավարձերը: «Այս տարի ամենաբարդն է լինելու կրթական համակարգի համար և ամենաքիչ դիմորդները լինելու են այս տարի` 12-ամյա կրթությանն անցնելու պատճառով»,-ասաց նա:
Ինչ վերաբերում է ԿԳ նախարար Լևոն Մկրտչյանի աշխատանքի գնահատմանը, բարեփոխումների իրականացմանը, ապա Սերգո Երիցյանը նշեց, թե կարծում է, որ նա մեծ ջանքեր է գործադրում: «Նա փորձում է տարբեր կրթական հատվածների թերությունները վեր հանել և ինչ-որ ծրագրեր նպատակամղել այդ ուղղությամբ: Որքանով դա կստացվի դժվար է ասել, բայց ներկայիս իրավիճակում և առկա թերություններում, անկասկած, կտրուկ քայլերի անհրաժեշտություն կա»,-ասաց նա:
Ըստ Սերգո Երիցյանի՝ կրթության ոլորտի ամենամեծ աքիլլեսյան գարշապարը ավագ դպրոցն է: «Ցավոք մենք ավագ դպրոցի հստակ անցումները չկարողացանք ապահովել և մեր բոլոր ջանքերը պետք է ուղղենք այդ ուղղությամբ: Ավագ դպրոցի զենքը հոսքային ուսուցումն է, իսկ մենք կարծես կարողանում ենք առավելագույն դեպքում երկու հոսքային ուսուցում ապահովել: Եթե ավագ դպրոցը չկայացավ կրթական համակարգի մյուս հատվածները դժվարություններ են ունենալու»,- ասաց նա և նշեց, որ պետք է կարողանանք ավագ դպրոցները ծառայեցնել իրենց նպատակին: Նա գտնում է, որ կրթության համար զարգացման նախադրյալներ պետք է այսօր ստեղծենք։