Քաղաքացիությունից հրաժարվել եմ, բայց չեմ ասել անունս հանեն. Արմեն Սարգսյան
Քիչ առաջ ավարտվեց նախագահի թեկնածու Արմեն Սարգսյանի և ԵԼՔ խմբակցության պատգամավորների հետ հանդիպումը: Հանդիպման ավարտից հետո Արմեն Սարգսյանը՝ պատասխանելով լրագրողների այն հարցին, որ Բրիտանական ընկերությունների Companies House ռեգիստրում գրանցված Eurasia House International ընկերության փաստաթղթերում Արմեն Սարգսյանը ներկայանում է որպես Բրիտանիայի քաղաքացի, ասաց.
«Այստեղ, որ դուք խնդիր եք փնտրում, խնդիր չկա: Ես եղել եմ Մեծ Բրիտանիայի քաղաքացի: 2000 թվականին, երբ ազատվեցի դեսպանի պաշտոնից, դրանից հետո դիմել եմ քաղաքացիության համար և ստացել եմ 2002 թվականին: Դրանից հետո քաղաքացիությունից հրաժարվել եմ 2011-ին: Հիմա դուք Companies House-ից օրինակներ եք բերում, բայց ես տասնյակ ընկերությունների խորհրդի կազմում եմ: Այդտեղ ինչ-որ տեղեր գրանցված է եղել, որ հայ եմ, իսկ ինչ-որ տեղեր՝ անգլիացի: 2011-ին քաղաքացիություն տալուց հետո չեմ հայտարարել, որ քաղաքացիությունից հրաժարվել եմ: Այդ բոլոր տեղերում ինձ ընդունել են որպես Արմեն Սարգսյան և ոչ թե Բրիտանիայի քաղաքացի: Դուք կարծում եք, որ մեկը քաղաքացիությունից հրաժարվեց, ուրեմն Բրիտանիան միանգամից հանեց»,- «Հայկական ժամանակ»-ի փոխանցմամբ՝ լրագրողների հետ զրույցում ասաց Արմեն Սարգսյանը: