Արմեն Սարգսյանը հանդիպել է Միլանի հայ հոգևորականների հետ և ներկայացրել Հայաստանի վերաբերյալ իր տեսլականը (լուսանկարներ)

Հայաստանի Հանրապետական կուսակցության կողմից ՀՀ նախագահի թեկնածու առաջարկված Արմեն Սարգսյանը փետրվար 2-ին հանդիպել է Միլանի Հայ ազգային եւ հոգեւոր հաստատությունների ներկայացուցիչների հետ:

Հանդիպումը տեղի է ունեցել Միլանի Հայ տուն ազգային հաստատության մեջ: Ներկա են եղել Իտալիո Հայոց հոգեւոր հովիվ, Արեւմտյան Եվրոպայի Հայրապետական պատվիրակի փոխանորդ Հայր Թովմա վարդապետ Խաչատրյանը, Միլանում ՀՀ պատվո հյուպատոս Տիար Պիետրո Քուչուկյանը, Միլանի Սուրբ Քառասուն մանկունք եկեղեցու Հոգաբարձության, Իտալիո Հայոց միության, Միլանի Հայ տան, «Սերապյան» ուսանողական հիմնադրամի, Հայ Բարեգործական Ընդհանուր միության, Միլանի Հայ համայնքի Երիտասարդական խորհրդի, Հայագիտության եւ Հայ Մշակույթի վավերագրման կենտրոնի ղեկավարներ եւ ղեկավար կազմի ներկայացուցիչներ:

Հանդիպման ընթացքում Արմեն Սարգսյանը ներկայացրել է Հայաստանի ապագայի վերաբերյալ իր տեսլականը, լսել է ներկաների տեսակետներն ու գաղափարները՝ ՀՀ ապագայի եւ արդեն նոր կառավարման ձեւաչափում մեր երկրի տարբեր ծրագրերին սփյուռքի ներգրավվածության վերաբերյալ:

Մտքեր են փոխանակվել Հայաստանում արդարադատության, առողջապահության եւ կրթության ոլորտների բարելավման, ինչպես նաեւ Հայրենիքի նկատմամբ մատաղ սերնդի հավատքի զորացման առնչությամբ:

Անկեղծ ու ջերմ մթնոլորտում արձանագրվել են մեր երկրի ձեռք բերած հաջողությունները, եւ դրանք միասնաբար՝ Հայաստանի եւ Սփյուռքի ջանքերով զորացնելու կամքն ու վճռականությունը: