Ժամանակն է ԼՂ կոնֆլիկտի կարգավորման սենսացիոն տարբերակներ մշակել՝ Սարգսյանն ու Ալիևը պետք է հանդիպեն սեփական նախաձեռնությամբ. Տրոֆիմչուկ
Ադրբեջանը զսպում է իրեն՝ ռազմական գործողություններ չի սկսում, բանակցություններին է մասնակցում, որովհետև միջազգային հանրությունը թույլ չի տա ևս մեկ անկայուն օջախի ստեղծում: Tert.am-ի հետ զրույցում ասաց միջազգայնագետ, անվտանգության և պաշտպանության ոլորտների փորձագետ, ռուս վերլուծաբան Գրիգորի Տրոֆիմչուկը:
«Ադրբեջանն իրեն հաշիվ է տալիս, իրականությանն օբյեկտիվ նայելիս հասկանում է, որ չի կարող թույլ տալ այնպիսի քայլեր, որոնց հետևանքում Հարավային Կովկասում պայթյունավտանգ իրավիճակ կստեղծվի: Ադրբեջանն ուզում է արագ լուծել ղարաբաղյան հակամարտությունը, բայց հասկանում է, որ եթե ռազմական ճանապարհով փորձի կարգավորել հակամարտությունը, Արևմուտքը միանգամից կմիջամտի, որովհետև աշխարհում բազմաթիվ անկայուն օջախներ կան: Սա է պատճառը, որ Ադրբեջանը զսպում է իրեն, բանակցություններին է մասնակցում»,- ասաց Տրոֆիմչուկը:
Վերլուծաբանի խոսքով՝ թե՛ Ադրբեջանը, թե՛ Հայաստանը բարձր են գնահատում հակամարտության կարգավորման գործընթացում Ռուսաստանի նախագահ Վլադիմիր Պուտինի դերը, ով շահագրգռված է թույլ չտալ կողմերի միջև ծավալել ավելի մեծ ռազմական գործողություններ, քան 2016թ.-ի ապրիլին էին:
«Ռուսաստանի նախագահի այս մոտեցումը աշխատեց: Մենք տեսնում ենք, որ 2016թ.-ի ապրիլից հետո շփման գծում լուրջ բախումներ չեն եղել, պատերազմ չի ծավալվել»- նշեց նա:
Տրոֆիմչուկը հիշեցրեց, որ հակամարտող կողմերի միջև ԱԳ նախարարների մակարդակով վերջին հանդիպումից հետո ձեռք բերվեց պայմանավորվածություն՝ ԵԱՀԿ անձնական ներկայացուցչի գրասենյակի ընդլայնման հարցում: Վերլուծաբանի խոսքով՝ նման պայմանավորվածություններ եղել են դեռ 90-ականներից, բայց դրանք իրականություն չեն դարձել: Գրիգորի Տրոֆիմչուկի դիտարկմամբ՝ պատճառն այն է, որ կողմերն անմիջապես իրար հետ չեն հանդիպում:
«Սերժ Սարգսյանն ու Իլհամ Ալիևը պետք է նախաձեռնեն իրար հետ հանդիպել առանց միջնորդների, իրենք լինեն հանդիպման նախաձեռնողը: Սա կլիներ համաշխարհային սենսացիա: Նրանք կարող էին, իհարկե, հրավիրել նաև միջնորդներին, բայց նախաձեռնողը լինեինք իրենք, որովհետև հակամարտության կարգավորման հարցում շահագրգռված են հենց հակամարտող կողմերը՝ Հայաստանն ու Ադրբեջանը»,- ասաց նա:
Տրոֆիմչուկի խոսքով՝ եթե Սերժ Սարգսյանն ու Իլհամ Ալիևը հանդիպեն, կարող են քննարկել փոխզիջումային տարբերակներ, այդ թվում այն տարբերակները, որոնք բազմիցս արտահայտել է Վլադիմիր Պուտինը:
«Հակառակ դեպքում մենք շարունակելու ենք տեսնել այն, ինչ տեսնում ենք՝ անվերջ բանակցություններ, անվերջ հանդիպումներ, որը նյարդայնացնում է Ադրբեջանին: Ժամանակն է հակամարտության կարգավորման աշխարհի համար սենսացիոն տարբերակների մշակում: Բոլորը մտածում են, որ Հայաստանն ու Ադրբեջանը հավերժ թշնամիներ են, բայց եթե կողմերը հայտարարեին, որ ուզում են իրար հետ հանդիպել, իրար հետ քննարկել իրավիճակը, դա կլիներ սենսացիա: Նրանք կընտրեին վայրը, ժամանակը և կքննարկեին»,- հավելեց նա:
Նա նաև առաջարկեց ևս մեկ ձևաչափ, որով կարելի է լուծել հակամարտությունը: Գրիգորի Տրոֆիչուկը նշեց, որ կարելի է ստեղծել փորձագետներից կազմված մի խումբ, ովքեր կզբաղվեն հակամարտության կարգավորմամբ: