Վարչապետի ենթակայության ներքո գործելու է 4 պետական մարմին. Դավիթ Հարությունյան
«Պետական կառավարման համակարգի մարմինների մասին» օրենքի նախագիծը սահմանում է, թե գործադիր իշխանության կառուցվածքում որ մարմինները ում են ենթարկվելու:
Այսօր՝ փետրվարի 1-ին, կառավարության նիստից հետո ներկայացնելով օրենքի նախագիծը, Արդարադատության նախարար Դավիթ Հարությունյանը նշեց. «Սահմանադրությունը ենթադրում է, որ գործադիր իշխանությունն ունի հետևյալ կառուցվածքը. կան նախարարություններ, կան նախարարություններին ենթակա մարմիններ, վարչապետին ենթակա մարմիններ և նախարարներին ենթակա մարմիններ: Մենք հստակ սահմանել ենք, թե որ մարմիններն են ենթակա նախարարություններին, վարչապետին և նախարարներին»:
Նա նշեց, որ այժմ իշխանությունը գնում է դեպի անձնական քաղաքական պատասխանատվության ինստիտուտի ամրապնդում. «Բայց որոշակի մարմիններ ունեն սպեցիֆիկա, օրինակ տեսչական մարմինները: Մենք փորձում ենք կրճատել տեսչական մարմինները, որի նպատակն է ունենալ 6 տեսչական մարմիններ, որոնք ծառայելու են ողջ կառավարության առջև դրված խնդիրներին, չեն վերաբերում կոնկրետ նախարարությունների, հետևաբար, պատասխանատվությունը պետք է լինի կոլեկտիվ, ոչ թե անձնական»,-ասաց նախարարը:
Ինչ վերաբերում է վարչապետին ենթակա մարմիններին, նա ասաց, որ դրանք թվով 4-ն են՝ ԱԱԾ-ն, ոստիկանությունը, վարչապետի վերահսկողական ծառայությունը և պետական պահպանության ծառայությունը: