Պարզվել են Դավթաշենում լցակայանի պայթյունի պատճառները. Հայտնաբերվել են խախտումներ
Հայաստանի արտակարգ իրավիճակների նախարարությունն ավարտել է հունվարի 19-ին Երեւանի Սասնա Ծռերի փողոցի թիվ 1/5 հասցեում գտնվող «Քար Գազ Սերվիս» ՍՊԸ-ի տարածքում թիվ 58 երթուղին սպասարկող «ԳԱԶել» մակնիշի ավտոմեքենայի պայթյունի վերաբերյալ իրականացվող քննությունը։ Այդ մասին հայտնեցին ԱԻՆ մամուլի ծառայությունից՝ NEWS.am-ի հարցմանն ի պատասխան։
Նշվում է, որ նախարար Դավիթ Տոնոյանի հրամանով ստեղծված Տեխնիկական քննություն իրականացնող հանձնաժողովն ավարտել է պայթյունի վերաբերյալ իրականացվող քննությունը՝ պարզելով «Քար գազ սերվիս» ՍՊԸ-ի կողմից շահագործվող ԱԳԼՃԿ-ում տեղի ունեցած պայթյունի պատճառներն ու հանգամանքները:
«Դժբախտ դեպքի պատճառ է համարվում թիվ 58 տրանսպորտային գիծ սպասարկող «ՈՒՂԵՎՈՐ ՏԱՐ» ՍՊԸ-ին պատկանող Գազել մակնիշի մարդատար երթուղային ավտոմեքենայի վրա տեղադրված բալոնի պայթյունը:
Տեխնիկական քննության նպատակով ԱԳԼՃԿ-ում կատարվել է կայանի տեխնիկական փաստաթղթերի եւ դեպքին վերաբերող այլ տվյալների ուսումնասիրություն:
Ըստ «ՈՒՂԵՎՈՐ ՏԱՐ» ՍՊԸ-ի տնօրենի կողմից տրամադրված տվյալների՝ երեք գազաբալոնների շահագործումը ուժի մեջ էր մինչեւ 29.12.2017 թ., իսկ չորրորդ գազաբալոնը, որը չի ունեցել որեւիցե փաստաթուղթ, մեքենայի վրա տեղադրվել է իրենց աշխատողների կողմից 8 ամիս առաջ:
Տեխնիկական քննության ընթացքում պարզվել են պայթյունի հետեւյալ պատճառները.
-պայթած գազաբալոնի զննումներից պարզ դարձավ, որ տվյալ բալոնը չի համապատասխանում սեղմված բնական մեթան գազով լցավորվող բալոնների տեխնիկական չափանիշներին, այսինքն տվյալ բալոնը չպետք է լցավորվեր:
-հաշվի առնելով այն հանգամանքը, որ լցարկումն ավարտված է եղել, ինչպես նաեւ լցասյունակներին տրվող գազի ճնշումը կարգավորվել է «ՋԻ ՋԻ ՍՈԼՅՈՒՇԻՆԵՍ» գործարանային արտադրության լցարկման ԲԱ 200 տիպի բաշխիչ աշտարակի միջոցով, ուստի համաձայն ՀՀ կառավարության 28. 08. 2008թ. թիվ 1101-Ն «Ավտոգազալցավորման ճնշակային կայանների /ԱԳԼՃԿ/ կառուցման եւ շահագործման նվազագույն պահանջների» տեխնիկական կանոնակարգը հաստատելու մասին որոշման 15–րդ գլխի 94-րդ կետերի պահանջների եւ շահագործա-տեխնոլոգիական նորմաների, լցարկվող գազի ճնշումը չպետք է գերազանցի 200 մթ-ից ավելի: Սակայն հնարավոր է, որ ԲԱ 200 տիպի գագի լցավորման բաշխիչ սյունակի աշխատանքի հնարավոր խափանման հետեւանքով գազաբալոնի մեջ լցվել է բ/ճ ճնշակային համակարգից դուրս եկող բարձր ճնշումը, որը կարող էր գերազանցել գազաբալոնը լիցքավորելու համար նորմայով նախատեսված 200 մթն ճնշումը:
Տեխնիկական քննության ընթացքում հանձնաժողովի կողմից վերցված գրավոր եւ բանավոր տեղեկատվություններից պարզվում է, որ գազալցավորման ընթացքում թույլ են տրվել լցավորման կարգի խախտումներ ինչպես գազալցավորողի, այնպես էլ՝ վարորդի կողմից:
Տեխնիկական քննություն իրականացնող հանձնաժողովի կողմից առաջարկվել է ԱԳԼՃԿ-ի նախագծերում կատարել փոփոխություն՝ նշելով նոր տեղադրված գազաբաշխիչ աշտարակները, կատարել սպասարկող անձնակազմի վերավորակավորում: ԱԳԼՃԿ–ի երկու լցասյունակների հետագա շահագործումը դադարեցվել է եւ կթույլատրվի ռեեստրում գրանցվելու, վերազինման փաստաթղթերի առկայության եւ օբյեկտի տեխնիկական անվտանգության փորձաքննության դրական եզրակացության առկայության պայմաններում:
Մանրամասները՝ այստեղ.