ԵՄ-ի հետ նոր համաձայնագրի իրականացումը կարող է սկսվել մայիսի կամ հունիսի 1-ից. Էդվարդ Նալբանդյան
ԵՄ հետ համապարփակ և ընդլայնված համագործակցության համաձայնագիրը լուրջ և կարևոր հանգրվան է Հայաստանի և Եվրամիության միջև հարաբերություններում. 2017 թվականին վերաբերող ամփոփիչ ասուլիսին այսպես ասաց Հայաստանի արտաքին գործերի նախարար Էդվարդ Նալբանդյանը՝ պատասխանելով համաձայնագրի վավերացման հնարավոր ժամկետներին վերաբերող հարցին:
«Այսօր մենք պետք է ամփոփենք այն ձեռքբերումները, որ ունեցել ենք Եվրամիության հետ և դրանց հիման վրա նախանշենք անելիքները գալիք տարիների համար: Այսօր մենք կենտրոնանում ենք այդ կարևոր շրջանակային փաստաթղթի վավերացման գործընթացի վրա: Հայաստանը հայտարարել է, որ քայլեր են ձեռնարկվում, որ այն վավերացվի մինչև ապրիլ: Բայց մենք մեկ քայլ առաջ ենք նայում: Իհարկե, հուսով ենք, որ առանց խոչընդոտների, կվավերացվի ԵՄ երկրների կողմից», - ասաց նա՝ նշելով, որ արդեն մեր վավերացումից կարող է ժամանակավոր սկսել համաձայնագրի իրականացումը,- հնարավոր է, որ դա լինի մայիսի 1-ից կամ հունիսի 1-ից»:
Էդվարդ Նալբանդյանը նշեց, որ շարունակելու են իրականացնել Եվրամիության հետ իրականացվող նախկին՝ նաև միասնական ավիացիոն գոտի ստեղծելուն վերաբերող ծրագրերը:
«Կարևոր է, որ առավել մեծ ջանքեր գործադրվեն եվրոպական միության երկրների հետ հարաբերությունների առավել ընդլայնման, զարգացման և ամրապնդման առումով»,- ասաց նա: