Գազի և դիզվառելիքի թանկացումը չի կարող հանգեցնել տրանսպորտի գների բարձրացման. Փոխնախարար
Արդյոք գործող փոփոխությունները կարող են ստեղծել գնաճային ճնշումներ և հանգեցնել ավտոտրանսպորտային փոխադրումների գների բարձրացման, և արդյոք դա կարող է հանգեցնել շղթայական էֆեկտի և նպաստել այլ ապրանքների գների բարձրացման. եթե շատ կարճ ամփոփենք, ապա երկու դեպքում էլ պատասխանը ո՛չ է: Այս մասին, այսօր՝ հունվարի 23-ին, ԱԺ-ում «Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով խորհրդարանական լսումների ժամանակ հայտարարեց ՀՀ տրանսպորտի, կապի և տեղեկատվական տեխնոլոգիաների փոխնախարար Արման Խաչատրյանը։
Նրա խոսքով, մինչև այս տարվա հունվարի 1-ը Հայաստանում միջմարզային, բացառությամբ Երևան, տրանսպորտային երթուղիներ սպասարկող ընկերությունները վճարում էին յուրաքանչյուր նստատեղի համար 2600 դրամ հաստատագրված վճար. «Նոր կարգավորումներով հաստատագրված վճարը փոխարինվել է արտոնագրային վճարով, որը կազմում է 2400 դրամ: Այն միկրոավտոբուսները, որի վերջնակետը կամ սկզբնակետը գտնվում է Երևանում, հաստատագրված վճարը կազմում էր 3120 դրամ, իսկ արտոնագրային վճարը հիմա կազմում է 3000 դրամ, այսինքն նվազել է 120 դրամով: Միջմարզային ավտոբուսային ընկերությունների համար դրույքաչափի փոփոխություն տեղի չունեցել»,-ընդգծեց փոխնախարարը:
Նրա խոսքով, ներկայումս միջմարզային երթուղային ցանցում շահագործվում է 175 ավտոբուս և 535 միկրոավտոբուս. «Ավտոբուսների 65 տոկոսը և միկրոավտոբուսներից 82 տոկոսը շահագործվում են բնական գազով, իսկ համապատասխանաբար ավտոբուսների 35 տոկոսը և միկրոավտոբուսների 18 տոկոսը շահագործվում են դիզվառելիքով:
Փոխնախարարն ընդգծեց, որ իրենց կողմից իրականացվել է միջմարզային երթուղիներում համեմատական հաշվարկ՝ փոխադրամիջոցների գազի վառելիքի և դիզվառելիքի հարկային օրենսդրության փոփոխությունների համադրությամբ։
«Հաշվի են առնվել ինքնարժեքի վրա ազդող այնպիսի գործոններ, ինչպիսիք են վառելիքի և քսայուղի ծախսերը, պահեստամասերի մաշվածությունը, հարկային և այլ պարտադիր վճարները, աշխատավարձերը և այլն։ Արդյունքում, գազով շահագործվող ավտոբուսային փոխադրումների գները 1 ուղևորի հաշվարկով կնվազեն 8 դրամով, միկրոավտուբուսային փոխադրումների գները՝ 3 դրամով: Դիզվառելիքով շահագործվող ավտոբուսների դեպքում նվազումը կկազմի 10 դրամ, միկրոավտոբուսների համար՝ 1 դրամ», - ասաց փոխնախարարը։
Ի մի բերելով ասվածը, նա արձանագրեց, որ գործող փոփոխությունները չեն կարող հանգեցնել դիզվառելիքով և գազով շահագործվող տրանսպորտային միջոցների վերջնական ապրանքների շղթայական բարձրացման. հակառակը, դրանք ունեն գնանկման մղելու ներուժ: