Հաշմանդամ պապը բարձրաձայնում է՝ ծնողազուրկ թոռներին ՊՆ-ն խաբեությամբ զորակոչել է բանակ՝ իր խնամակալության տակ թողնելով անչափահաս քրոջը

2-րդ կարգի հաշմանդամ 63-ամյա Վարազդատ Խաչատրյանը Tert.am-ին է դիմել՝ բարձրաձայնելով, թե իր խնամակալություն տակ գտնվող թոռնիկներին Պաշտպանության նախարարությունն անօրինական կերպով ու խաբեությամբ զորակոչել է բանակ. նրանք վիճակահանությամբ ծառայության են անցել Արցախի Հանրապետությունում:

Վարազդատ Խաչատրյանն ասաց, որ 3 թոռներին ինքն է մեծացրել, երկկողմանի ծնողազուրկ են, չնայած որ ծնողները կենդանի են, և հիմա տղաների անչափահաս քույրը՝ 14 տարեկան Միլենան, մնացել է իր խնամակալության տակ այն դեպքում, երբ ինքը հիվանդ է՝ էպիլեպտիկ նոպաներ է ունենում և աղջկան ի վիճակի չէ խնամել:

«Ծնողները բաժանվել են, հրաժարվել երեխաներից, որոշել երեխաներին մանկատուն տանել, հետո երկուսն էլ թողել, հեռացել են Հայաստանից։ Ստիպված ես եմ վերցրել երեխաներին իմ խնամակալության տակ, նշանակում է՝ երկկողմանի ծնողազուրկ են, քանի որ հրաժարվել են երեխաներից: Հիմա հարց եմ տալիս՝ հիվանդանոցներից դուրս չեմ գալիս, քրոջն ո՞վ է խնամելու»,-ասաց նա:

Բացի այդ, պապը նշեց, որ թոռներից մեծը՝ Վարազդատը, հոգեկան խնդիրներ ուներ, նույնիսկ բուժում ստանալու համար պառկել է հոգեբուժարանում, իսկ մյուսը գոտկատեղին լողացող մեծ խալ ունի և իրավունք չունի զենք կրել: Բայց, այդքանով հանդերձ, պապը նշեց, թե ինքը չի բողոքում նրա համար, թե ինչու են տարել բանակ, այլ՝ ինչու այդքան հեռու:

«Ես ընդամենը 37 000 դրամ թոշակ եմ ստանում, ծանր սոցիալական վիճակի մեջ եմ, բայց հարցը դրանում չի։ Ես նախարարությանը խնդրեցի, որ գոնե մոտիկ տեղ գցեք Հայաստանում, որ ես կարողանամ իրենց այցելել, գոնե երեխաներս ուրախ ծառայեն: Թող ծառայեն, դա իրենց պարտքն է, ես չեմ ասում՝ չծառայեն, բա հայրենիքի համար պետք է ծառայեն։ Ոչինչ, որ հիվանդ եմ, բայց նենց անեին, որ ես կարողանայի գոնե այցելել, գոնե պրիսյագին գնալ»,-ասաց նա:

Հարցին, թե տեղյակ չէ՞, որ օրենքի փոփոխությամբ ծնողազուրկ զինծառայողներն այլևս արտոնված չեն նախկինի պես ծառայության անցնել 150 կմ հեռավորությամբ շառավղով, փոխարենը մարտական հերթապահություն կիրականացնեն, եթե իրենք ցանկանան, Վարազդատ Խաչատրյանը պատասխանեց, որ տեղյակ է, բայց, նրա խոսքով, տղաներին խաբեությամբ են տարել:

Ըստ նրա, տղաներից փոքրին՝ Արտակին հունվարի 15-ին վերջնական բուժզննման են կանչել, և «խաբեբայությամբ գրել են տվել, որ ինքնակամ անմիջապես պատրաստ է զորակոչվել բանակ»:

Միաժամանակ նա նշեց, թե մեծ եղբորը՝ Վարազդատին առանց բուժզննման ծանուցում են ուղարկել հունվարի 16-ի համար և հիշեցրեց, որ նրա ծառայությունը հետաձգվել էր, քանի որ հոգեբուժարանում պառկել էր:

«Գրել են, թե քրոջը թողնում են պապիկի խնամակալության տակ, ու պապիկին չեն հարցրել: Ես երկրորդ կարգի հաշմանդամ եմ, ունեմ շատ մեծ խնդիրներ, այսինքն՝ ուշագնաց եմ լինում, հանկարծակի ընկնում, հոդային խնդիրներ ունեմ»,-ասաց նա և նշեց, թե ինքը դիմել է Պաշտպանության նախարարություն, բայց ապարդյուն:

«Ես 15-ին զանգահարեցի Գենշտապ, զանգահարեցի նախարարության թեժ գիծ, թե ինչ է նշանակում առանց կոմիսիա անցնելու երեխաներին զորակոչել բանակ, զանգահարել եմ գեներալ Գեղամ Հարությունյանին, իրեն ասել եմ, որ սենց բան ա կատարվում։ Ասաց՝ բա շուտ դիմում գրեիք, ասացի՝ ես շա՞տ իմանամ, որ տենց բան ա լինելու, որ շուտ դիմում գրեի, ասում եմ՝ 15-ին գրել եք, 16-ին տարել, ի՞նչ է կատարվում: Ինձ խաբեցին, ասացին, որ զորակոչի տեղը կոմիսիա կանցնի և բաց կթողնեն, որովհետև անչափահաս քույր ունի, դու էլ երկրորդ կարգի հաշմանդամ ես: Բայց հավաքակայանատեղիում ասացի նորից գեներալին մոտենամ, գեներալը ցանկություն չունեցավ խոսել։ Ասել էր՝ հանեք պապիկին դուրս, խաբելով ինձ դուրս քաշեցին, դուռը փակեցին ու երեխաներին տարան»,-ասաց նա:

Վարազդատ Խաչատրյանն ասաց, թե թոռնիկները Մարտակերտի շրջան են ընկել, և ինքն ի վիճակի չէ անգամ երդման արարողությանը մասնակցել: «Պրիսյագին ես չեմ կարողանա գնալ, ոչ ոք չունեմ գնացող, էդ երեխեքը, դե պատկերացրեք, ինչ կլինի, երբ որ ոչ մեկ չկարողանա գնալ իրենց պրիսյագին, ծնողները բոլորը գնան, բացի իմ երկու թոռների հարազատներից: Ես չեմ էլ իմացել Ղարաբաղ կքաշեն, նախօրոք եմ զանգահարել, կարող եք ստուգել: Նախարարությունից ասում են՝ շուտ պետք է դիմեիր, պետք է շուտ իմանայի, որ տանում են, որ դիմեի»,-ասաց նա և նշեց, թե պատրաստվում է նաև Մարդու իրավունքների պաշտպանին դիմել: