Կառավարությունը որոշել է զբաղվել 2000-ականների սերնդի ծնելիությամբ

Կառավարությունը հավանություն տվեց օրենսդրական նախաձեռնությանը, որը նախատեսում է բազմազավակ ընտանիքների աջակցության մեծացում և բնակչության վերարտադրողականության ընդլայնմանն ուղղված միջոցառումներ: Կառավարության հունվարի 18-ի նիստում համապատասխան փաթեթը ներկայացրեց աշխատանքի և սոցիալական հարցերի նախարար Արտեմ Ասատրյանը:

Առաջարկվում է լրացումներ կատարել մի շարք օրենքներում՝ «Բազմազավակ ընտանիքների մասին», «Բնակչության բուժօգնության և սպասարկման մասին», «Կրթության մասին», «Նախադպրոցական կրթության մասին», «Տարրական մասնագիտական և միջնակարգ մասնագիտական կրթության մասին», «Բարձրագույն և հետբուհական կրթության մասին»: «Այս լրացումների նպատակն է հարաբերությունների կարգավորումը, որոնք կապված են բազմազավակ ընտանիքներին օժանդակություն ցուցաբերելու, բազմազավակ ընտանիքների հիմնական պահանջմունքները բավարարելու և խնդիրներն ինքնուրույն լուծելու, նրանց սոցիալական մեկուսացումը կանխելու և ընդհանրապես երկրում ժողովրդագրական վիճակը բարելավելու հետ»,- պարզաբանեց նախարարը:

Օրինագծերի փաթեթի հիմնավորման մեջ նշված է, որ բազմազավակ ընտանիքներին պետության աջակցության համակարգային միջոցառումների իրականացումը պայմանավորված է Հայաստանի ներկայիս ժողովրդագրական իրավիճակով, մասնավորապես՝ ծնելիության ցածր մակարդակով: Հայաստանում ծնելիության մակարդակն անկարող է նույնիսկ պարզ վերարտադրություն ապահովել, ինչի համար անհրաժեշտ է, որ մեկ ընտանիքը 2,1 երեխա ունենա: Առաջիկա տարիներին ամուսնանալու տարիքի է հասնում մեծ թիվ չկազմող սերունդը, որը ծնվել է 2000-ականների սկզբին, որի վերարտադրողական պոտենցիալը պետք է ամբողջությամբ օգտագործվի: «Ժողովրդագրական կայունության համար պետք է ապահովել ոչ միայն պարզ, այլ նաև ընդարձակ վերարտադրություն, կտրուկ մեծացնել ընտանիքների թիվը, որոնք նրանց հատկացված որոշ երաշխիքների ճանապարհով ունեն 4 և ավելի երեխա»,- նշված է փաստաթղթում:

Ներկայումս Հայաստանում բազմազավակ ընտանիքների սատարման քիչ ծրագրեր կան, որոնք ընդամենը ուղղված են սոցիալական խնդիրների լուծմանը, բայց ոչ բազմազավակության խրախուսմանը: