Նախագահական նոր նստավա՞յր Երևանում. ընդունելությունների տունը նորոգվում է (լուսանկարներ)
Կառավարության ընդունելությունների տանը վերանորոգման աշխատանքներ են ընթանում: Մամուլում օրերս հրապարակում եղավ այն մասին, որ ընդունելությունների տունը պետք է վերածվի նախագահական նստավայրի, որտեղ 2018 թվականի ապրիլից հետո պետք է տեղակայվի նորընտիր նախագահի աշխատակազմը: Հրապարակման համաձայն, Բաղրամյան 26-ում գտնվող նախագահական նստավայրը վերածվելու է վարչապետի նստավայրի:
«Ընդունելությունների տուն» ՓԲԸ-ն ընդգրկված է «Պետական գույքի մասնավորեցման 2017-2020թթ. ծրագրի մասին» ՀՀ օրենքի ցանկերում: «Ընդունելությունների տուն» ՓԲԸ-ի գործունեության ոլորտն է՝ միջոցառումների կազմակերպում, հյուրանոցային ծառայությունների մատուցում: 2017 թվականի առաջի 9 ամիսների համար ընկերությանը պետական բյուջեից հատկացվել էր 54 միլիոն դրամ:
«Հայկական ժամանակ»-ի՝ ստորև ներկայացված լուսանկարներում պարզ երևում է, որ «Ընդունելությունների տուն» ՓԲԸ-ում պարզապես ընթացիկ վերանորոգման աշխատանքներ չեն կատարվում: Հիմնական շենքի ֆասադին ամրացված են մետաղական կոնստրուկցիաներ, որոնք վկայում են այն մասին, որ շենքի արտաքին տեսքը ևս կարգի է բերվում: Բակում առկա են նաև միջսենյակային պատ կառուցելու քարեր, բեռնափոխադրման մեքենա, պարկեր և այլն:
Ընդունելությունների տուն ՓԲԸ-ի շենքը Երևանի Մաշտոցի պողոտայում՝ Մատենադարանի հարևանությամբ
Պետական գույքի կառավարման վարչության մամուլի քարտուղար Մարգարիտա Սարգսյանը մեր զրույցում ասաց, որ պետական գույքի կառավարման վարչությունում «Ընդունելությունների տուն» ՓԲԸ-ի հետագա շահագործման վերաբերյալ որևէ որոշում չի կայացվել: «Իրականացվում է ընթացիկ նորոգման աշխատանքներ: Կոմունալ ենթակառուցվածքներ են նորոգվում, ջուր էր թափվել և այլն»,- ասաց Մարգարիտա Սարգսյանը:
Հարցին՝ կարո՞ղ ենք նկարահանում իրականացնել «Ընդունելությունների տանը», պետական գույքի կառավարման վարչության մամուլի խոսնակը բացասական պատասխան տվեց: Պատճառաբանությունը հետևյալն է՝ «Ընդունելությունների տունը» հատուկ պահպանվող տարածք է, ինչպես նաև այժմ վերանորոգման աշխատանքներ են կատարվում: «Նախկինում էլ է եղել հատուկ պահպանվող տարածք, հիմա էլ է այդպես»,- նշեց Մարգարիտա Սարգսյանը:
Խոսնակից հետաքրքրվեցինք նաև՝ ի՞նչ ընթացակարգով «Ընդունելությունների տունը» կարող է հանվել պետական գույքի մասնավորեցման ծրագրից: «Որևէ տարբերակ չի քննարկվում: Ինչ էլ որ արվի, պետք է արվի կառավարության որոշմամբ, որից հետո էլ պետք է օրենքի նախագիծը գնա ԱԺ: Մասնավորեցման ցանկում գտնվող գույքի նկատմամբ օրենքով թույլատրելի գործողություններ կան, որոնք հնարավոր է անել մինչև մասնավորեցնելը՝ նորոգել, վարձակալության տալ և այլն»,- ասաց Մարգարիտա Սարգսյանը:
Ընդունելությունների տուն ՓԲԸ-ի անցակետն ու գլխավոր մուտքը
Կառավարության աշխատակազմի տեղեկատվության և հասարակայնության հետ կապերի վարչության պետ Զոյա Բարսեղյանը մեր զրույցում ասաց, որ մասնավորեցման ենթակա պետական գույքի ցանկից որևէ գույք հանելու դեպքում պետք է պետական գույքի կառավարման վարչությունը կառավարության որոշման նախագիծ ներկայացնի գործադիրին: «Ընդունված ընթացակարգ է: ՊԳԿՎ ներկայացնում է համապատասխան օրենքի նախագիծը, կառավարության նիստում արդեն հավանության է արժանանում և ԱԺ է գնում»,- ասաց Զոյա Բարսեղյանը՝ նշելով, որ կառավարության աշխատակազմը նման որոշման նախագիծ չի մշակում: Մեր պարզաբանմանը, որ նախագահական նոր նստավայրի վերաբերյալ հարցը նաև քաղաքական ենթատեքստ ունի ր, որ պետական գույքի կառավարման վարչությունը սեփական նախաձեռնությամբ դժվար թե որոշի, թե ապագա վարչապետը պետք է աշխատի Բագրամյան 26-ում, թե այլ վայրում, Զոյա Բարսեղյանն առաջարկեց հարցին հանգամանալից պատասխանել վաղը:
Ընդունելությունների տունը Կասկադի կողմից
Անցյալ ուրբաթ պետական գույքի կառավարման վարչության պետ Արման Սահակյանը, պատասխանելով մեր թղթակցի հարցին՝ հնարավո՞ր է «Ընդունելություների տուն»-ը դառնա ապագա նախագահական նստավայրը, իսկ Սերժ Սարգսյանը մնա Բաղրամյան 26-ում վարչապետի կարգավիճակով, պատասխանել է. «Բնականաբար, իրականությանը դրանք այս պահին չեն համապատասխանում, ես ինչու եմ դա ասում, որովհետև ըստ էության հետագայում թե որ շենքը, որ գերատեսչությունը կզբաղեցնի, կամ որ մարմինը կզբաղեցնի, դա կամրացվի օրենքով»: