Ամերիկայի հայերը վիրավորվել են «կեղտոտ հայ» արտահայտությունից
Օրերս հայտնել էինք, որ ամերիկյան Comedy Central ալիքի Daily Show հաղորդման ընթացքում երգիծաբան Թրևոր Նոան, ծաղրելով ԱՄՆ նախագահ Դոնալդ Թրամփի՝ իր ստաբիլ հոգեկան առողջության մասին Twitter-ում հրապարակած գրառումը, օգտագործել էր «կեղտոտ հայ» բառակապակցությունը:
Նշենք, որ գրառման մեջ ԱՄՆ նախագահը հայտարարել էր, թե հոգեպես կայուն է, այնուհետև՝ ինքն իրեն անվանել էր հանճար։
Ամերիկայի հայ իրավաբանների ասոցիացիան (ABA) և Հայ Դատի գրասենյակը (ANCA) հումորիստի արտահայտության մեջ հայերին ուղղված վիրավորանք տեսան և քայլեր են ձեռնարկում ներողություն ստանալու համար։ Սակայն բազմաթիվ ամերիկահայեր հենց ABA և ANCA ֆեյսբուքյան էջերում հայտարարել են, որ վիրավորական տարր հաղորդման մեջ չկար․ նպատակը Թրամփի արտահայտության իրարամերժությունը ցույց տալն է, և տվյալ կոնտեքստում հայերի հիշատակումն ԱՄՆ նախագահի խոսքերի աբսուրդն էր ընդգծում։
Նոան ասել է, որ միայն Թրամփը կարող էր պաշտպանել իրեն և նույն նախադասության մեջ ամբողջովին արժեզրկեր իր ասածը: «Դա նման կլիներ նրան, եթե մեկն ասեր՝ «Ես ամենահանդուրժող մարդն եմ, հարցրեք այս կեղտոտ հային»,- նշել է Նոան: