Վաղուց անցել է ոստիկանության հաշվին ինքնահաստատվելու ժամանակները. Անձնագրային և վիզաների վարչություն

Անձնագրային և վիզաների վարչության պետ Մնացական Բիչախչյանը հաղորդում է.

«www.Lragir.am կայքում հրապարակվել է ժողովրդագետ Արտակ Մարկոսյանի հայտարարությունը, համաձայն որի ոստիկանության կողմից տրամադրված պաշտոնական տեղեկություններն առ այն, որ 2012 թվականից ի վեր 15.000 անձ հրաժավել է ՀՀ քաղաքացիությունից, կասկած են հարուցում: Վերջինս իր կասկածները հիմնավորում է նրանով, որ ավելի մեծ թվով ՀՀ քաղաքացիներ են դիմել այլ պետության քաղաքացիություն ստանալու համար՝ բնականաբար հրաժարվելով ՀՀ քաղաքացիությունից, քանի որ կոնկրետ ՌԴ-ի դեպքում երկքաղաքացիությունը ընդունված չէ: 

Մարկոսյանի խոսքով՝ ոստիկանությունը անելիքներ ունի Հայաստանի մշտական բնակչության ցուցակները վերջնական մաքրելու ուղղությամբ, որպեսզի պարզ լինի բնակչության իրական թիվը:

Պարոն Մարկոսյանին խորհուրդ կտայի մերկապարանոց հայտարարություններով հանդես չգալ և անհիմն մեղադրանքներ չհղել ոստիկանության հասցեին: Վաղուց անցել է ոստիկանության հաշվին ինքնահաստատվելու ժամանակները: Կարելի է ասել, դուք ձեր գործով զբաղվեք, մենք՝ մեր:

Եթե կասկած են հարուցում ցուցանիշները, հրավիրում ենք անձնագրային և վիզաների վարչություն, որտեղ պահվում են քաղաքացիության վերաբերյալ դիմումների հիման վրա կազմված բոլոր գործերը և առանց անձնական տվյալները հրապարակելու թույլատրել հատ առ հատ հաշվելու դրանք:

Ինչ վերաբերում է իրավական ընթացակարգերին, թե որ պետությունում ինչպես է շնորհվում այդ երկրի քաղաքացիությունը, այս դեպքում այդքան էլ էական չէ, քանի որ ՀՀ քաղաքացիության դադարեցման համար այլ պետությունում գտնվելու դեպքում դիմումն անձն անձամբ պետք է ներկայացնի ՀՀ հյուպատոսական ծառայություն, իսկ ՀՀ-ում գտնվելու դեպքում՝ անձնագրային և վիզաների վարչություն:

Դիմումի հետ ներկայացվում են ՀՀ օրենսդրությամբ սահմանված փաստաթղթեր, 6 գունավոր լուսանկար, տեղում լրացվում է դիմում հարցաթերթիկ, վճարվում պետական տուրք: Փոստով ուղարկված դիմումները կամ նոտարիատում հաստատված համապատասխան հայտարարությունները չեն համարվում ՀՀ քաղաքացիության դադադարեցման համար պատշաճ ընթացակարգ: 

Հավելենք նաև, որ «ՀՀ քաղաքացիության մասին» ՀՀ օրենքի 1-ին հոդվածի համաձայն ՀՀ քաղաքացիությունից հրաժարվելը կամ այլ պետության քաղաքացիություն ընդունելն ինքնին չի հանգեցնում ՀՀ քաղաքացիությունը կորցնելուն: Անձը Հայաստանի Հանրապետության քաղաքացիությունը կորցնում է քաղաքացիության դադարեցման հետևանքով:

Նույն օրենքի 26-րդ հոդվածի համաձայն ՀՀ քաղաքացիությունը դադարեցվում է ՀՀ Նախագահի հրամանագրով»: