Արարատի մարզի ոստիկաններն ու քննիչները պարզել են «Ջերմուկ ՇԻՆ» ՓԲԸ-ի տնօրենի կողմից BMW X5-ով վրաերթի հետևանքով մահացածի ինքնությունը (տեսանյութ)

Հայաստանի քննչական կոմիտեի Արարատի մարզային քննչական վարչության և Ոստիկանության Արարատի մարզային վարչության, ինչպես նաև Ճանապարհային Ոստիկանության 2-րդ սպայական գումարտակի 1-ին վաշտի 2-րդ դասակի ծառայողները պարզել են հունվարի 8-ին Արարատի մարզում վրաերթի հետևանքով մահացածի ինքնությունը։

Shamshyan.com-ի տեղեկություններով՝ պարզվել է՝ նա Արարատի մարզի Ոսկետափ գյուղի բնակիչ՝ 81-ամյա Սուրիկ Վարդանյանն էր։

Ինչպես ավելի վաղ դեպքի վայրից հայտնել էր ֆոտոլրագրողը, հունվարի 8-ին մահվան ելքով վրաերթ էր տեղի ունեցել Արարատի մարզում: Ժամը 20:30-ի սահմաններում Ջերմուկ քաղաքի բնակիչ, 56-ամյա Կորյուն Ստեփանյանը իր վարած BMW X5 մակնիշի 777 TV 07 համարանիշի ավտոմեքենայով Մեղրի-Երևան ավտոճանապարհի 337-րդ կմ հատվածում՝ Արարատի վարչական տարածքում, վրաերթի էր ենթարկել դեռևս ինքնությունը չպարզված 60-70 տարեկան տղամարդու:

Վարորդը փախուստի չէր դիմել, փորձել էր օգնություն ցուցաբերել վրաերթի ենթարկվածին, սակայն վերջինս տեղում մահացել էր:

Վարորդը ահազանգել էր 1-03 բժշկական կենտրոն, այնուհետև Ճանապարհային Ոստիկանության օպերատիվ կառավարման կենտրոն:

Դեպքի վայր էին ժամանել Ճանապարհային Ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ վաշտի հրամանատար Տիգրան Գրիգորյանի, դասակի հրամանատար Սանասար Հարությունյանի գլխավորությամբ: Ժամանել էին նաև Ոստիկանության Արարատի մարզային վարչության օպերատիվ խումբը՝ վարչության պետ Սևան Քոչարյանի և Ոստիկանության Արարատի բաժնի օպերատիվ խումբը՝ բաժնի պետ Համլետ Ղամբարյանի գլխավորությամբ:

Դեպքի վայրի տեղազննության ժամանակ պարզվել էր, որ վրաերթի ենթարկվածը 27 մետր շպրտվել էր: Դեպքի մասին ՃՈ 1-77 օպերատիվ կառավարման կենտրոնի պատասխանատու հերթապահ Դավիթ Գրիգորյանը տեղեկությունը փոխանցել էր Հայաստանի քննչական կոմիտեի Արարատի մարզային քննչական վարչություն, որտեղից ժամանել էր քննչական խումբը՝ հատկապես կարևոր գործերով քննիչ Ահարոն Սաֆարյանի գլխավորությամբ, ում կողմից փաստի առթիվ նյութեր էին նախապատրաստվում: Քննիչի հանձնարարականով վարորդը տեղափոխվել էր բժշկական կենտրոն, ենթարկվել բժշկական փորձաքննության, պարզվել էր, որ նա եղել էր սթափ: