3 տարուց իրեն «հանճար» համարող Թրամփն այլևս նախագահ չի լինի, իսկ Պուտինը հավերժ է
«Առավոտ» թերթն իր խմբագրականում գրում է. «ԱՄՆ նախագահ Դոնալդ Թրամփը, պարզվում է, հանճար է: Համենայնդեպս, նա իրեն այդպիսին է համարում: Ինչպե՞ս է Թրամփը հիմնավորում իր հանճարեղ լինելը: Շատ պարզ. քանի որ նա մեծ հաջողությունների է հասել բիզնեսում, ինչպես նաև հեռուստատեսային գերաստղ էր, իսկ հետո դարձել է ԱՄՆ նախագահ, ուրեմն նա հանճար է:
Սակայն ակնհայտ է, որ Թրամփն առաջին հաջողակ բիզնեսմենը չէ ու առաջին աստղը չէ Միացյալ Նահանգների պատմության մեջ: Կարելի է հիշեցնել նաև, որ Թրամփից առաջ այդ հրաշալի երկիրն ունեցել է 44 նախագահ: Միթե նրանք բոլորը հանճարներ էին: (Գիտեմ, որ անգլերեն «genius» և հայերեն «հանճար» բառերի իմաստների միջև որոշակի տարբերություն կա, բայց լեզվաբանական նրբություններն այստեղ այնքան էլ էական չեն): ԱՄՆ ներկայիս ղեկավարը որոշել է բարձրաձայնել իր արտառոց արժանիքների մասին ի պատասխան ամերիկացի լրագրող Մայքլ Վուլֆի գրքի, որտեղ հեղինակն ապացուցում է, որ ԱՄՆ նախագահն օժտված չէ բարձր մտավոր կարողություններով, քիչ է կարդում և բացարձակապես հետաքրքրասեր չէ:
Վուլֆի գիրքը, որը կոչվում է «Կրակ և ցասում», լույս է տեսել երեկ, սակայն որոշ դրվագներ մինչ այդ արդեն իսկ հայտնի էին դարձել հանրությանը: Իսկ մեր կողմից արձանագրենք, որ պետական գործչի հանճարը և նույնիսկ տաղանդը բացահայտվում է նրա քայլերի արդյունավետության միջոցով: Եթե դիտարկենք թեկուզ ՄԱԿ-ի Անվտանգության խորհրդի վերջին երկու քվեարկությունները Երուսաղեմի և Իրանի հարցերով (դեկտեմբերի 18-ին և հունվարի 5-ին), երբ անգամ ԱՄՆ-ի դաշնակիցներն էին հակադրվել ամերիկյան նախաձեռնություններին, կարելի է ենթադրել, որ այդ նախաձեռնությունները հանճարեղ չէին:
Նման բարձրագոչ մակդիրը, հավանաբար, չի կարելի կիրառել նաև 18 միլիարդ դոլարով Մեքսիկայի հետ պատ կառուցելու գաղափարին: Իհարկե, ԱՄՆ ներկայիս վարչակազմն ունի նաև լավ, ճիշտ մտահղացումներ, որոնց շարքից են, իմ կարծիքով, «գրին-քարտի» խաղարկության դադարեցումը կամ հարկային բարեփոխումները: Ինչպես և աշխարհի ցանկացած ղեկավար, Թրամփն արել է և անելու է բազմաթիվ ճիշտ և սխալ քայլեր: Բայց նա, ինձ թվում է, հանճար չէ:
Հանճարը Մոցարտն է, որի ցանկացած ստեղծագործություն գլուխգործոց է: Սակայն ամերիկյան համակարգի առավելությունն այն է, որ 3 տարուց կամ (որն ավելի քիչ հավանական է) 7 տարուց Թրամփն այլևս նախագահ չի լինի: Իսկ, օրինակ, Պուտինը հավերժ է»:
Առավել մանրամասն՝ թերթի այսօրվա համարում