Վարչապետի հովանավորյալները չարիք են դարձել հասարակության գլխին

Ինչպես արդեն հայտնի է, հունվարի 8-ին խոշոր ու ողբերգական ավտովթար տեղի ունեցավ Երևանում: Ժամը 04:10-ի սահմաններում ԱԻՆ Փրկարար ծառայության օպերատիվ կառավարման կենտրոն ահազանգ է, որ Աբովյան փողոցի և Սայաթ Նովա պողոտայի խաչմերուկում ավտովթար է տեղի ունեցել:

Ողբերգական ավտովթարը խլեց Ճանապարհային ոստիկանության երկու ծառայողների՝  Արեգ Դավթյանի և Խաչիկ Գասպարյանի կյանքը: Վերջինս հիվանդանոց էր տեղափոխվել ծայրահեղ ծանր վիճակում, ստացել էլ գլխի սալջարդ, պարանոցի ողի, թոքի, կոնքի և ազդրի կոտրվածք: Ժամեր առաջ հայտնի դարձավ, որ նա ևս մահացել է հիվանդանոցում:

Ողբերգական պատահարը տեղի է ունեցել է բազմաթիվ ավտովթարների հեղինակ, քրեական պատմություններով հարուստ, նախկինում դատապարտված «Ճվճըվ Արո» մականունով հայտնի Արա Վարդանյանի որդու՝ Սարգիս Վարդանյանի մասնակցությամբ, ով արդեն իսկ ձերբակալվել է: Հայտնի դարձավ, որ այսօր հետախուզում է հայտարարվել նաև «Ճվճըվ Արոյի» կրտսեր որդու՝ Սերժ Վարդանյանի նկատմամբ: Նա ՀՀ քրեական օրենսգրքի երկու հոդվածներով՝ ՀՀ ՔՕ 176-րդ հոդվածի 1-ին մասով (կողոպուտ) և ՀՀ ՔՕ 258-րդ հոդվածի 3-րդ մասի 1-ին կետի հատկանիշներով (խուլիգանություն, որը կատարվել է մի խումբ անձանց կողմից) ներգրավվել է որպես մեղադրյալ:

Այս երկու եղբայրները, ովքեր վարչապետ Կարեն Կարապետյանի մտերիմ ընկերոջ՝ Նիկոլայ Գաբրիելյանի (Գազի Կոլյա) թոռներն են, պատուհաս են դարձել հասարակության գլխին: Նիկոլայ Գաբրիելյանը նաև վարչապետի բիզնես-գործընկերն է, նրանք միասին բազմաթիվ բիզնեսներ ունեն, այդ թվում՝ «Ֆլորենս» ռեստորանային համալիրը:

Սարգիս և Սերժ Վարդանյանները, լինելով վարչապետի մտերիմ ընկերոջ թոռները, ամեն անգամ հենց կառավարության ղեկավարի միջնորդությամբ են խուսափել քրեական պատասխանատվություն կրելուց: Արդյունքը սա է, և ՃՈ երկու ծառայողների մահը մնում է միջնորդողների խղճին:

ՃՈ երկու ծառայողի կյանք խլած ավտովթարի մեղավոր Սարգիս Վարդանյանն արդեն իսկ ձերբակալվել է, նրա եղբայրն էլ հետախուզման մեջ է. կարծես թե մոտենում է արդար դատաստանի առջև կանգնելու և ծանր հետևանքներ թողած արարքների պատասխանը տալու ժամանակը: