Հայտնի է փաստաբան Վաղինակ Աթոյանի գործով դատավարության առաջին օրը

Դատական տեղեկատվական համակարգից տեղեկանում ենք, որ փաստաբան Վաղինակ Աթոյանի գործով դատավարությունը կմեկնարկի հունվարի 8-ին: Գործը քննվելու է Երևանի Շենգավիթ վարչական շրջանի ընդհանուր իրավասության դատարանում, դատավորն է Նելլի Բաղդասարյանը:

Ըստ մեղադրանքի, Վաղինակ Աթոյանը կատարել է խոշոր չափերով կաշառք տալու փորձի դրդչություն: Փաստաբանը հանդիսացել է Վերաքննիչ քրեական դատարանում քննված քրեական գործով ամբաստանյալ Մանուկ Մանուկյանի շահերի պաշտպանը: Նշված քրեական գործով ՀՀ վերաքննիչ դատարանի 03.10.2017թ. կայացված դատական ակտով Մ.Մանուկյանի նկատմամբ նշանակված 3 տարի ժամկետով ազատազրկման ձևով պատիժը բեկանվել և նշանակվել է ավելի մեղմ պատիժ` 2 տարի ժամկետով ազատազրկում:

Օգտվելով ստեղծված բարենպաստ պայմաններից` դատարանի հիշյալ որոշմամբ կատարված դրական փոփոխություններն իրեն վերագրելու և դատական ակտը կայացրած դատավորների կողմից իբր կաշառք ստանալու շուրջ պայմանավորվածություն ձեռք բերելու մասին մտացածին իրադարձությունների միջոցով անձի վստահությունը չարաշահելու եղանակով, խաբեությամբ զգալի չափերով ուրիշի գույքի հափշտակություն կատարելու դիտավորությամբ, հոկտեմբերի 4-ին Վ.Աթոյանը «Նուբարաշեն» քրեակատարողական հիմնարկում տեսակցել է Մանուկ Մանուկյանին: Վաղինակ Աթոյանը ինչպես Մանուկ Մանուկյանին, այնպես էլ հետագայում նրա քրոջը` Սեդա Մանուկյանին, իրականությանը չհամապատասխանող տեղեկություններով հավաստիացրել է, թե իբր դատավորները Մ.Մանուկյանի օգտին գործողությունները կատարել են կաշառքի դիմաց, ապա` համոզելու եղանակով դրդել է տալ կաշառքի առարկա հանդիսացող 470 հազար դրամը, ինչի կապակցությամբ Մանուկ և Սեդա Մանուկյանները տվել են իրենց համաձայնությունը:

Հիշյալ եղանակով Վաղինակ Աթոյանը դրդել է Մանուկ և Սեդա Մանուկյաններին կատարել հանցանք` տալ խոշոր չափերով կաշառք: Այնուհետև` 04.10.2017թ. ժամը 15:30-ի սահմաններում Վ.Աթոյանը Երևան քաղաքի Շենգավիթ վարչական շրջանում տեղակայված «Նաիրիտ» գործարանի հարակից տարածքում Սեդա Մանուկյանից անձամբ ստացել է հիշյալ 470 հազար դրամը:

Արդյունքում հանցագործությունը` Մանուկ և Սեդա Մանուկյանների կողմից խոշոր չափերով կաշառք տալը, ավարտին չի հասցվել իրենց կամքից անկախ հանգամանքներով, քանի որ Վ.Աթոյանը հիշյալ գումարը խաբեությամբ հափշտակել է:

Այս գործով մեղադրյալներ են նաև Մանուկ և Սեդա Մանուկյանները:

Վաղինակ Աթոյանին մեղադրանք է առաջադրվել Քրեական օրենսգրքի 38-34-312-րդ հոդվածի 2-րդ մասով, Սեդա Մանուկյանին և Մանուկ Մանուկյանին՝ 34-312-րդ հոդվածի 2-րդ մասով: Վաղինակ Աթոյանը և Սեդա Մանուկյանը ստորագրությամբ ազատ է արձակվել, իսկ Մանուկ Մանուկյանի նկատմամբ խափանման միջոց չի ընտրվել, քանի որ մեկ այլ քրեական գործով արդեն իսկ կալանքի տակ է նա: