ՃՈ–ն հստակեցնում է մոպեդների, հեծանիվների և կվադրոցիկլների վարման կարգը. որոշ փոխադրամիջոցների երթևեկություն հիմնական փողոցներով կարգելվի. փոխոստիկանապետ

ԱԺ Պաշտպանության և անվտանգության հարցերի մշտական հանձնաժողովում քննարկվում է «Ճանապարհային երթևեկության անվտանգության ապահովման մասին» Հայաստանի Հանրապետության օրենքում փոփոխություններ և լրացումներ կատարելու մասին օրենքի նախագիծը, որի հիմնական զեկուցողն է ` ՀՀ ոստիկանության պետի տեղակալ Վարդան Եղիազարյանը:

Նրա խոսքով՝ նախագծերի ընդունման անհրաժեշտությունը պայմանավորված է ճանապարհային երթևեկության անվտանգության ապահովման բնագավառում առկա իրավական, ինչպես նաև օրենքների գործնական կիրառման ընթացքում ի հայտ եկած մի շարք խնդիրներին լուծում տալու նպատակով:

««Ճանապարհային երթևեկության անվտանգության ապահովման մասին» Հայաստանի Հանրապետության օրենքում սահմանված հասկացությունները պետք է հստակեցնել և համապատասխանեցնել ներկայիս պահանջներին, ինչպես նաև սահմանել նոր հասկացություններ: Մաքսային ռեժիմների անվանումները համապատասխանեցնել գործող օրենսդրությանը, կարգավորել, առավել հստակ սահմանել տրանսպորտային միջոցի գրանցումը մերժելու հիմքերը, տեխնիկական զննություն չանցած, առանց թույլտվության վերասարքավորված կամ անսարքություն ունեցող տրանսպորտային միջոցների շահագործումը` համարանիշերը հանելու միջոցով արգելելու ընթացակարգի փոխարեն նախատեսել շահագործումը` հաշվառման վկայագիրը վերցնելու միջոցով արգելելու ընթացակարգը»,- ներկայացրեց նա:

Ըստ Եղիազարյանի՝ օրենքի նախագծով նախատեսվում է կարգավորել վարորդական վկայականներ տալու, փոխանակելու, կորած վարորդական վկայականի փոխարեն նորը տալու հարցը:

«Պետք է սահմանել մոպեդները Ճանապարհային ոստիկանությունում գրանցելու, հաշվառման համարանիշեր հատկացնելու, իսկ դրանք վարելու համար էլ վարորդական վկայական ունենալու պահանջ: Ինչպես նաև հստակեցման անհրաժեշտություն կա հեծանիվ վարելու վերաբերյալ դրույթների հետ կապված: Այժմ սահմանվում է, թե մինչև 14 տարեկան անձը որտեղ և ինչ պայմանների ապահովմամբ կարող է վարել հեծանիվ: Պետք է կարգավորել հեծանվորդների ու մոպեդների վարորդների և լծասայլերի( լծասահնակների) երթևեկության, ինչպես նաև բեռնակիր և հեծկան կենդանիներին ու անասուններին քշելու վերաբերյալ ալ մինչ այժմ չկարգավորված իրավահարաբերությունները»,- ընդգծեց Վարդան Եղիազարյանը:

ՀՀ ոստիկանության պետի տեղակալը նշեց, որ օրենսդրական փաթեթը ներառում է նաև Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ անելը:

«Ձյունագնացից բացի նախատեսել նաև կվադրոցիկլը (մոտոամենագնացը) և ձյունաճահճագնացը, քանի որ դրանք ևս հանդիսանում են արտաճանապարհային փոխադրամիջոցներ և դրանց շահագործումն ընդհանուր օգտագործման ավտոմոբիլային ճանապարհներով ևս արգելված է»,- հավելեց Եղիազարյանը:

Վերջինիս հարցեր ուներ հանձնաժողովի նախագահ Կորյուն Նահապետյանը, սակայն նրա հարցը վերաբերում էր օտարերկրյա համարանիշներով մեքենաներին:

«Վերջին 2 տարվա ընթացքում օտարերկրյա համարանիշներով մեքենաներն ընդհանուր խախտումների մեջ ի՞նչ տոկոս են զբաղեցնում, ինչպե՞ս եք կարգավորում այս հարցը»,- հարցրեց Կորյուն Նահապետյանը:

Ի պատասխան պատգամավորի՝ Վարդան Եղիազարյանն ասաց, որ այս պահին ձեռքի տակ չունի ցուցանիշները, սակայն վստահեցրեց, որ հարցը ոստիկանության ուշադրության կենտրոնում է: Նրա խոսքով՝ ճանապարհային ոստիկանության բարեփոխումների շրջանակում առանձնակի ուշադրություն է դարձվում այս կարգի տրասնպորտային միջոցների խնդրի կարգավորմանը:

«Մեր ուշադրության կենտրոնում է այս կարգի տրանսպորտային միջոցների կողմից իրավախախտումների խնդիրը լուծելը: Այժմ արդեն գործում է դրույթը, որ սահմանի վրա ոչ հայկական համարանիշներով վարորդների նկատմամբ կիրառվի վարչական պրակտիկա: Եթե նա խախտել է ՀՀ ճանապարհային երթևեկության կանոնները, մեզ մոտ կա համապատասխան արձանագրություն, ապա սահմանի վրա նա իրազեկվում է, որ վճարումները կատարի, հակառակ դեպքում՝ տվյալ մեքենայով այլևս ՀՀ մուտք գործելու հնարավորություն չի ունենա»,- պատասխանեց Վարդան Եղիազարյանը:

Ի վերջո, նախագիծը դրվեց քվեարկության և արժանացավ դրական եզրակացության՝5 կողմ, 1 ձեռնպահ ձայների հարաբերակցությամբ մտավ ԱԺ լիագումար նիստ: Սակայն այն չի քննարկվի հունվարի 15-ին ԱԺ լիագումար նիստում՝ ոստիկանությունը ժամանակ խնդրեց: