ԿԲ նախագահ Արթուր Ջավադյանը անդրադարձել է ՀՀ տնտեսական աճին

Կենտրոնական բանկում կայացած միջոցառմանը ԿԲ նախագահ Արթուր Ջավադյանը ասել է, որ գնաճային սպասումների նվազման պարագայում դեռևս 2015 թվականից վերաֆինանսավորման տոկոսադրույքը նվազեցվել է 12 անգամ: Ընդհանուր 4.5 տոկոսային կետով տոկոսադրույքի նվազեցումը ԿԲ-ն իրականացրել է արտաքին աշխարհի եւ ներքին տնտեսության ռիսկերի կշռմամբ:

«Կենտրոնական բանկի ճկուն քաղաքականությունը որոշակիորեն մեղմել է Հայաստանի տնտեսության վրա արտաքին ցնցումների բացասական ազդեցությունները, և փաստ է, որ տարածաշրջանի երկրներից Հայաստանի Հանրապետությունում են արձանագրվել նվազագույն տատանողականությամբ տնտեսական ցուցանիշներ: Ներկայումս ակնհայտ են տնտեսական աճի համար հենասյուն հանդիսացող գնաճային կայուն միջավայրի առկայությունը, տնտեսական ակտիվության եւ ներքին պահանջարկի աճի միտումները: 2017 թվականն ավարտում ենք գնաճի նպատակի տատանումների թույլատրելի միջակայքում»,- նշել է նա:

Ընդամենը 2 շաբաթ առաջ Ֆիտչ վարկանշային կազմակերպությունը Հայաստանի տնտեսության հեռանկարը կայուն զարգացողից փոխել է դրական զարգացողի, ինչի համար կարեւոր գործոն է հանդիսացել նաեւ Կենտրոնական բանկի դրամավարկային քաղաքականությունը, որը Ֆիտչը կրկին գնահատել է վստահելի:

«Կենտրոնական բանկը, գների կայունության ապահովմանը զուգահեռ, մշտապես կարեւորել է ֆինանսական կայունության ապահովումը, որը 2018 թվականից, գների կայունության հետ հանդիսանալու է Կենտրոնական բանկի հիմնական նպատակ, ինչը ժամանակի մարտահրավեր է եւ միտում է դարձել համաշխարհային ֆինանսատնտեսական ճգնաժամից հետո:

Ֆինանսական համակարգի կայունության եւ զարգացման խնդրի ներքո մեր գործողությունները, ի թիվս այլոց, ուղղված են ֆինանսական համակարգում մրցակցության խորացմանը, վարկավորման եւ ներգրավված միջոցների ժամկետայնության աճին եւ ապադոլարիզացիային, որոնք տնտեսության վարկավորման հետագա աճի կարեւորագույն նախապայմաններ են: Այս քաղաքականությունը հիմնականում իրականացվել է տարբերակված պարտադիր պահուստավորման նորմատիվային գործիքի կիրառմամբ, եւ քաղաքականության դրական արդյունքներն ակնհայտ են: Վարկերի եւ ավանդների դոլարիզացման մակարդակի նվազեցման վերաբերյալ փաստվում է նաեւ վարկանշային կազմակերպությունների կողմից, ինչը վերջիններիս գնահատմամբ անհրաժեշտ է դրամավարկային եւ ֆինանսական կայունության ապահովման տեսանկյունից: Կայուն է գնահատվել նաեւ բանկային համակարգը՝ բնութագրելով այն «բարձր կապիտալացված»,- ասել է Ջավադյանը: