ՀՀ-ն գնում է ժողովրդավարական զարգացման ճանապարհով. Էդուարդ Շարմազանով
ՀՀԿ ԳՄ նիստում քննարկվել են ՀՀ ներքին և արտաքին խնդիրները: Այսօր ՀՀԿ ԳՄ նիստի ավարտին այս մասին հայտարարեց ԱԺ փոխխոսնակ, ՀՀԿ մամուլի խոսնակ Էդուարդ Շարմազանովը: Նա շեշտեց, որ ՀՀԿ-ն 2017 թ.-ի քաղաքական տարին դրական է գնահատում:
«Մենք այս տարի իրականացրեցինք շատ դրական խորհրդարանական ընտրություններ, որոնք ստացան միջազգային հանրության և միջազգային բոլոր դիտորդական առաքելությունների դրական վերաբերմունքը: Ավելին՝ մենք ունենք կայուն քաղաքական իրավիճակ, որն ամենաանհրաժեշտ գործոններից մեկն էր թե՛ տնտեսական աճի, թե՛ առհասարակ զարգացման համար»,- ասաց նա:
Շարմազանովի գնահատմամբ՝ այս տարին ևս ապացուցեց, որ ՀՀ-ն գնում է ժողովրդավարական զարգացման ճանապարհով: Որպես խոսքի ապացույց` նա հիշեց ՀՀ-ԵՄ շրջանակային համաձայնագիր ստորագրումը: ՀՀԿ խոսնակը կարծում է, որ ՀՀ–ն կարողացել է նաև լուրջ քայլեր անել անվտանգության համակարգի ամրապնդման և բանակի հզորացման ուղղությամբ:
«Մենք առաջնթաց ունեցանք նաև արտաքին մարտահրավերներին դիմակայելու հարցում` նկատի ունեմ թե՛ Արցախյան հիմնահարցը, թե՛ Ցեղասպանության միջազգային ճանաչման գործընթացը, որտեղ կարողացանք որոշակի դրական տեղաշարժեր ապահովել»,- շարունակեց Էդուարդ Շարմազանովը:
Վերջինս անդրադարձավ նաև Ադրբեջանի նախագահի օգնականի հայտարարությանը, թե պատրաստ են Ղարաբաղին տալ բարձր կարգավիճակ: Շարմազանովն Ադրբեջանի պաշտոնյայի հայտարարությունները հիմնազուրկ ու անհեթեթ որակեց:
«Մի պետություն չի կարող մի անկախ պետության տալ պետության կարգավիճակ, ԼՂՀ-ն նույն իրավական ու օրենսդրական հիմքերով է առանձնացել ԽՍՀՄ-ից: Դա ուշացած, անհեթեթ հայտարարություն էր, կա Մինսկի խմբի ձևաչափ, կա ՀԱՊԿ-ի դեկտեմբերյան հայտարարությունը, կան նաև Բրյուսելում համաձայնագրի ժամանակ ԵՄ-ի նշումները 3 սկզբունքների միասնական կիրառման ու ինքնորոշման իրավունքի վերաբերյալ »,- ընդգծեց Շարմազանովը:
ԱԺ փոխնախագահը նշեց, որ ադրբեջանական կողմի հայտարարություններն անիմաստ են ու կապ չունեն իրականության հետ:
«Հայաստանը բանակցում է երկու կարևոր հարցի շուրջ, ինչի մասին խոսել է նախագահը Ժնևում։ Նախագահն ասել է՝ Արցախը ոչ մի կարգավիճակով չի կարող լինել Ադրբեջանի մաս, Արցախի ժողովրդի անվտանգության երաշխիքները մեզ համար շատ կարևոր են, եթե ադրբեջանցիները սա փորձում են ներկայացնել որպես փոխզիջում, մի բան կարող եմ ասել` բարև ձեզ»,- եզրափակեց Շարմազանովը:
Էդուարդ Շարմազանովը խոսեց նաև ՌԴ ԱԳՆ պաշտոնական ներկայացուցիչ Մարիա Զախարովայի՝ Թուրքիայի նախագահ Ռեջեփ Թայիփ Էրդողանի հայտարարության պատասխանի մասին, այն է, որ Սիրիայի նախագահն ահաբեկիչ է անվանել Սիրիայի առաջնորդ Բաշար Ասադին, ինչն իրավական հիմքեր չունի: Շարմազանոն այս հայտարարության մեջ զարմանալու բան չի տեսնում. շեշտեց, որ ինքը միշտ եղել է այն կարծիքին, որ Թուրքիան Հարավային Կովկասում շարունակում է մնալ Ռուսաստանի համար մեկ մրցակիցը, եթե ոչ հակառակորդը, թեև կա թվացյալ մերձեցում 2 պետությունների միջև:
«Թուրքիան ու Ռուսաստանն արդեն 300 տարի է մրցակցում են և հակառակորդ պետություններ են Կովկասյան տարածաշրջանում: Նրանցից յուրաքանչյուրն ունի իր շահերը, նրանք օբյեկտիվներն չեն կարող լինել դաշնակիցներ, բայց մերձեցումներ կարող են լինել՝ որոշակի շահերից ելնելով: Գլոբալ առումով Թուրքիան ու Ռուսաստանը տարբեր պետական շահեր ունեն այս տարածաշրջանում, նրանց կարծիքները տարբեր են ոչ միայն Սիրիայի հարցում, այլև ՌԴ-ի համար շատ կարևոր Ղրիմի հարցում, որտեղ Ռուսաստանի ու Թուրքիայի կարծիքները բավականին իրարամերժ են: Միայն քաղաքագիտությունից կամ ռուս-թուրքական հարաբերություններից չհասկացող մարդիկ կարող էին եզրակացություն անել, որ ՌԴ-ն Էրդողանի հայտարարության հետ կապված պաշտոնական հայտարարություն չի անի կամ չեզոքություն կպահի»,-շարունակեց Էդուարդ Շարմազանովը՝ նկատելով, որ ՌԴ ևս մեկ անգամ ցույց տվեց, որ չի պատրաստվում ի շահ Թուրքիայի զոհաբերել իր պետական շահը: