10-հարկանի շենքի բարձրությամբ ձնեմարդուց մինչև ոսկեզօծ տոնածառը. ամանորյա ռեկորդները (լուսանկարներ)
Առաջարկում ենք ծանոթանալ ամենահետաքրքիր ամանորյա ռեկորդներին:
Ամենաերկար նամակը Սանտային. գրել են 2000 աշակերտներ
Ինը օր ավելի քան 2000 ռումինացի աշակերտներ՝ 8-14 տարեկան, երազանքների կոլեկտիվ նամակ են գրել Սանտա Կլաուսին: Վերջնական արդյունքում ստացվել է 413.8 մետր երկարությամբ նամակ և այն ամենաերկարն է պատմության մեջ: Ակցիան կազմակերպվել էր ռումինական փոստային ծառայության կողմից 2008 թվականին և շեշտը դրվել էր ծառերի պահպանման և ռացիոնալ օգտագործման վրա: Ամեն երեխա սկսել էր իր խոսքը Սանտային՝ շրջակա միջավայրի մասին հոգ տանելու և անտառները պահպանելու խնդրանքով:
Ամենաբարձր ձնեմարդը. ձեռքերի փոխարեն՝ ծառեր
Մեզնից ովքե՞ր չեն փորձել պատրաստել ամենամեծ ձնեմարդը՝ ի համեմատություն մյուսների պատրաստածների:
Ամերիկյան Բետալ քաղաքի բնակիչներն ավելի հեռուն են գնացել և 2008 թվականին ստեղծել ամենաբարձր ձնեմարդուն, ավելի ճիշտ՝ «մեգաձնեմարդուն» աշխարհում: 37 մետր երկարությամբ գեղեցկուհուն անվանել են Օլիմպիա ի պատիվ տեղի նահանգապետ Օլիմպիա Սնոուի: Ռեկորդ սահմանած ձնեմարդը 10 հարկանի շինության բարձրություն ունի, կշռում է 6 տոննա, իսկ որպես ձեռքեր ծառայել են ծառերը, շրթունքները 5 ավտոմեքենաների անվադողեր են եղել, իսկ թարթիչները՝ դահուկներ:
Ամենամեծ տոնածառի գունդը՝ Ռուսաստանում
2016 թվականի դեկտեմբերին ամանորյա ռեկորդների թիվն ավելացավ ևս մեկով, և այն Ռուսաստանից էր: Մոսկվայում տեղադրեցին եղևնու խաղալիքի տեսքով մեծ գունդ՝ 17 մետր տրամագծով: Գնդի ներսում պարահրապարակ էր ստեղծվել, և հնչում էին տոնական երգեր: Հսկայական խաղալիքը պատրաստված էր 23 000 լամպերով:
Ամենաթանկարժեք տոնածառն աշխարհում. զարդարված է մարգարիտով և ոսկով
Ձեր կարծիքով, որքա՞ն կարող է արժենալ մեկ տոնածառը՝ խաղալիքների հետ: Պատասխանը՝ 11 միլիոն ռուբլի: Հենց այսքան գումար են ծախսել Աբու Դաբիում «Emirates Palace» հյուրանոցի աշխատակիցներն ամանորյա տոնածառը զարդարելու համար: Կանաչ գեղեցկուհին զարդարված էր ոսկուց պատրաստված գնդերով, թանկարժեք քարերով և մարգարիտով, ինչպես նաև ապարանջաններով, ժամացույցներով և վզնոցներով:
Ամենափոքրիկ ամանորյա բացիկը. այն աչքին տեսանելի չէ
Այն ժամանակները, երբ մենք շնորհավորական բացիկներ էինք ուղարկում ընկերներին և մտերիմներին, անվերադարձ հեռացած են թվում: Կապի ժամանակակից միջոցները և մեր կյանքի դինամիկ ռիթմը հեռու են տարել թղթային անցյալը:
Սակայն հենց այդ առաջատար տեխնոլոգիաներն են օգնել Գլազգոյի համալսարանի գիտանականներին ստեղծել սուրբծննդյան բացիկներ: Արդյունքում ստեղծվել է աշխարհի ամենափոքրիկ բացիկը: Ապակու փոքրիկ կտորի վրա պատկերվել է եղևնի: Սակայն այսպիսի քարտ նվիրելն այնքան էլ հեշտ առաջադրանք չէ, քանի որ անզեն աչքին այն տեսանելի չէ:
Ամենամասսայական ամանորյա երեկույթը՝ 4 միլիոն մարդ
2008 թվականին Ռիո դե Ժանեյրոյի ափին ամանորյա հրավառությունը, որը տևեց 20 րոպե, հավաքեց ավելի քան 4 միլոին մարդու: Այս երեկույթը համարվում է աշխարհում ամենաբազմամարդը: Իշխանություններն այս մեծ թվով մարդկանց պատճառով ստիպված են եղել դադարեցնել տրանպորտային երթևեկությունը: Տոնել են անկեղծ սրտով. կրքոտ պարերի ժամանակ նրանց անգամ չի խանգարել 35 աստիճան տապը: