Այս տարին հոբելյանական էր Ռուսաստանի հետ դիվանագիտական հարաբերությունների առումով. Շարմազանովը ամփոփում է տարին

2017թ.-ը բավականին հագեցած և դրական տարի էր: Անցնող տարին այսօր՝ դեկտեմբերի 27-ին, այսպես բնորոշեց Ազգային ժողովի փոխնախագահ, ՀՀԿ մամուլի խոսնակ Էդուարդ Շարմազանովը լրագրողների հետ հանդիպմանը:

Ըստ Շարմազանովի, այս տարի անվտանգության, ներքին և արտաքին քաղաքականության զարգացման առումով ավելի շատ դրական իրավիճակներ կային, քան բացասական: Նախ և առաջ, ԱԺ փոխնախագահն ընդգծեց ապրիլի 2-ին կայացած խորհրդարանական ընտրությունները, որոնք, նրա գանահատմամբ հաջողված էին:

«Այս ընտրությունները հաջողված էին, իրենց թերություններով հանդերձ՝ սրանք լավագույնն էին անկախ Հայաստանի խորհրդարանական ընտրությունների պատմության մեջ: Միջազգային դիտորդների կողմից որևէ կասկած քաղաքացիների քվեարկության գաղտնիությունն ապահովելու առումով չի եղել: Այս ընտրությունները շատ կարևոր քայլ էին ժողովրդավարացման զարգացման առումով»,- ասաց Էդուարդ Շարմազանովը:

Հաջորդ կարևոր իրադարձությունը, ըստ ՀՀԿ մամուլի խոսնակի, մայիսի 18-ին Սերժ Սարգսյանի ծրագրային ելույթն էր. «Անկախ նրանից՝ ով է լինելու վաղը կամ մյուս օրը երկրի ղեկավարը, չի կարող անտեսել այդ մարտահրավերները: Առաջինը, կոռուպցիայի դեմ պայքարն է, որի դեպքում հետևյալ ֆորմուլան պետք է գործի՝ ազնվություն գումարած պրոֆեսիոնալիզմ հանած կոռուպցիա, եթե չգնանք այս ճանապարհով, արդյունավետ կառավարում չենք ունենալու: Երկրորդը, ժողովրդագրական խնդիրներն են. մենք դրեցինք հստակ չափանիշ, թե ինչքան բնակչություն ենք ունենալու 2040թ.-ին»:

Անդրադառնալով արտաքին քաղաքականությանը՝ Շարմազանովը նշեց, որ այս տարին հոբելյանական էր Ռուսաստանի հետ դիվանագիտական հարաբերությունների առումով:

«Իրական դաշնակցային հարաբերություններ ունենք Ռուսաստանի հետ: Մեր խորին համոզմամբ, այդ դաշնակցային հարաբերությունները պետք է խորացնել և զարգացնել: Ինչ վերաբերվում է ԵՏՄ-ին, ապա այն մեզ շատ լավ հնարավորություններ է տվել զարգանալու: Թվեր չեմ ներկայացնի, բայց տարին բավականին հուսադրող է, մենք լավագույնն ենք տնտեսական ցուցանիշներով, Հայաստանը տնտեսական ցուցանիշներով առաջ է ԱՊՀ երկրների շարքում: ԵՄ-ի հետ համաձայնագիրն էլ մեզ համար կարևոր նշանակություն ունի»,- նշեց Շարմազանովը: