Հայաստանում հնարավոր է 7 տոկոս տնտեսական աճ գրանցվի. Փորձագետ

Եվրասիական տնտեսական միության համար 2017-ը բավական հաջողակ տարի էր: Այս մասին դեկտեմբերի 26-ին լրագրողների հետ հանդիպման ժամանակ հայտարարել է «Ինտեգրացիա և զարգացում» հասարակական կազմակերպության նախագահ Արամ Սաֆարյանը:

Նրա խոսքերով՝ այս մասին միաձայն հայտարարում են ինչպես փորձագիտական հանրության, այնպես էլ Ռուսաստանի, Բելառուսի և Ղազախստանի պետական մարմինների ներկայացուցիչները:

«Դեկտեմբերի 20-ին Եվրասիական տնտեսական հանձնաժողովի Կոլեգիայի նախագահ Տիգրան Սարգսյանը մամուլի ասուլիսի ժամանակ կրկնել է նույն միտքը և ընդգծել, որ 2017-ը աննախադեպ հաջողակ տարի էր»,- նշել է Սաֆարյանը՝ հավելելով, որ անկման գործընթացները հաջողվել է կասեցնել տնտեսության բոլոր ոլորտներում, իսկ որոշ դեպքերում՝ նույնիսկ հասնել բոլոր ակնկալիքները գերազանցող աճի ցուցանիշների:

Այս ամենը, ըստ Սաֆարյանի, հիմք է տալիս, որպեսզի բազմաթիվ փորձագետներ գան հետևյալ եզրակացության. 2018-2019 թվականները կարող են դրական լինել հատկապես Եվրասիական տնտեսական միության «լոկոմոտիվ երկրների» համար, որոնք տնտեսական աճի առումով կարող են կտրուկ առաջընթաց գրանցել, ինչը, ընդհանուր առմամբ, շատ դրական ազդեցություն կունենա նաև ԵԱՏՄ-ի այլ մասնակիցների վրա:

Ինչպես ընդգծել է ՀԿ-ի ղեկավարը, 2016 թվականին, երբ շատ երկրներ բավականին բարդ իրավիճակում էին հայտնվել տնտեսական ճգնաժամի և դրա հետևանքների պատճառով, Հայաստանը տնտեսության շատ կարևոր ոլորտներում զարմանալի նվաճումներ կարողացավ արձանագրել, իսկ 2017 թվականին այդ դրական միտումները շարունակվում էին:

«Հենց դա է հիմք տալիս կարծել, որ տնտեսական մոբիլիզացման, ճիշտ կառավարման և ադեկվատ հասարակական իրավիճակի դեպքում 2018-2019 թվականներին Հայաստանում լիովին հնարավոր է մոտ 7% տնտեսական աճը», - եզրակացրել է Արամ Սաֆարյանը: