Սուր վիրուսային հիվանդություններն անցած տարվա համեմատ ավելի քիչ են. Արա Ասոյան
ՀՀ գլխավոր համաճարակաբան Արա Ասոյան այսօր լրագրողների հետ զրույցում խոսելով հիվանդությունների տարածման մասին, նշեց, որ տարվա ամեն ամիսն իրեն բնորոշ հիվանդություններն ունի: Նա ասաց, որ այս ամիսներին եղանակը ավելի մեղմ է և թեև կան սուր վիրուսային հիվանդություններ, սակայն անցած տարվա հետ համեմատ դրանք երկու-երեք անգամ ավելի քիչ են:
Նա նշեց, որ հիվանդների հստակ թիվ հնարավոր չէ ասել, քանի որ ամեն մի հարբուխի դեպքում չէ, որ անձը դիմում է տեղամասային պոլիկլինիկա, որպեսզի հաշվառում կատարվի։ «Այսինքն՝ այդ թվերն իրականությունից բավականին հեռու են լինում: Մենք ունենք միջին համեմատականը, որը ես՝ որպես մասնագետ, տեսնում եմ, որ անցած տարվա համեմատ ավելի պակաս է»,-ասաց նա:
Արա Ասոյանը նշեց, որ Հայաստանում գրիպը գալիս է հիմնականում Ռուսաստանից: «Հենց տեսնում եք, որ Ռուսաստանում գրիպի համաճարակ է գրանցվում, ընդամենը երկու կամ երեք շաբաթ հետո, նույնը կրկնվում է Հայաստանում, քանի որ մեզ մոտ ամենամեծ շփումը Ռուսաստանի հետ է»,- ասաց նա և նշեց, որ մարզերում սուր շնչառական հիվանդություններն ավելի քիչ են լինում:
ՀՀ գլխավոր համաճարակաբանն ասաց, որ այս տարի ևս առողջապահության նախարարությունը բավականին մեծ քանակի պատվաստանյութ է բերել գրիպի դեմ և խոցելի խմբի բուժաշխատողները պատվաստվել են: Ինչ վերաբերում է թունավորումներին, նա նկատեց, որ բավական խստացված է հսկողությունը, հատկապես մանկապարտեզներում, դպրոցներում:
Անդրադառնալով պապիլոմա վիրուսի դեմ պատվաստմանը՝ Արա Ասոյանն ասաց, որ այդ վիրուսը արգանդի վզիկի քաղցկեղ է առաջացնում: «Այն չար վիրուս է և 72 երկրում կատարվում է այդ պատվաստումը»,-ասաց նա: