Ինչո՞ւ Վրաստանը չի հանձնում Հայաստանի կողմից հետախուզվող կասկածյալներին
«Ժողովուրդ»-ի տեղեկություններով` ՀՀ իրավապահներին այդպես էլ չի հաջողվում Հայաստան տեղափոխել Երևանի «Թուֆենկյան» հյուրանոցի մոտ տեղի ունեցած սպանության մեջ կասկածվող երկու անձանց, որոնք Վրաստանում կալանավորվել են:
Բանն այն է, որ քրեական հեղինակության ընկեր Գագիկ Մոսինյանին սպանողներին Հայաստանի իրավապահներին հանձնելու գործընթացը անընդհատ ձգձգվում է: Կալանավորվածներին արտահանձնելու համար անհրաժեշտ է Վրաստանի ղեկավարության համաձայնությունը, բայց ՀՀ իրավապահները դեռևս չեն կարողանում դրական արդյունքի հասնել:
Ինչպես հայտնի է` 2017 թվականի սեպտեմբերի 14-ին «Թուֆենկյան» հյուրանոցի մոտ «Մակարով» ատրճանակից և «ԱԿ» տեսակի ինքնաձիգից կրակոցներ էին արձակվել Ալավերդի քաղաքի բնակիչ, 43-ամյա Գագիկ Մոսինյանի և նրա ընկերոջ՝ 39-ամյա Վահագն Աբգարյանի ուղղությամբ: Արդյունքում Գագիկ Մոսինյանը տեղում սպանվել էր, իսկ Վահագն Աբգարյանը մարմնական վնասվածքներով տեղափոխվել էր հիվանդանոց:
Սպանությունը կատարելու կասկածանքով հետախուզում հայտարարվեց Ալբերտ Բլբուլյանի, Արմեն Կարադավիդովի և Ռաֆիկ Խաչատրյանի նկատմամբ: Կարճ ժամանակ անց Ռաֆիկ Խաչատրյանին ՀՀ իրավապահները հայտնաբերեցին Կոտայքի մարզում: Այնուհետև` հոկտեմբերի 29-ին, Վրաստանում հայտնաբերվեցին Ալբերտ Բլբուլյանը և Արմեն Կարադավիդովը, ու ՀՀ իրավապահների կողմից հայտարարված հետախուզման հիմքով կալանավորվեցին: Նոյեմբերի 6-ին ՀՀ գլխավոր դատախազությունը պաշտոնական հաղորդագրություն տարածեց, որում մասնավորապես ասվում է. «ՀՀ գլխավոր դատախազությունը «Թուֆենկյան» հյուրանոցի մոտ տեղի ունեցած հանցագործությունն առերևույթ կատարելու համար հետախուզվող երկու անձանց Վրաստանից Հայաստան տեղափոխելու և ՀՀ իրավասու մարմիններին հանձնելու մասին միջնորդություններ է ուղարկել Վրաստանի դատախազություն»:
Վերը նշված միջնորդությունից անցել է ավելի քան մեկ ամիս, սակայն Ալբերտ Բլբուլյանի և Արմեն Կարադավիդովի` Հայաստան տեղափոխելու միջնորդության պատասխանը Վրաստանի գլխավոր դատախազությունից այդպես էլ չի հաջողվում ստանալ:
«Ժողովուրդ» օրաթերթին որոշ տվյալներ են հայտնի դարձել այն մասին, թե ինչու է ուշանում սպանության մեջ կասկածվողների Հայաստան տեղափոխելու գործընթացը: Պարզվում է՝ մինչև սպանության տեղի ունենալը Ալբերտ Բլբուլյանը և Արմեն Կարադավիդովը իրենց մտերիմների շրջապատում հայտնել են, որ Վրաստանի Հանրապետությունում իրենք շատ լավ կապեր ունեն և ցանկացած հարցով նրանց դիմելու դեպքում իրենք խնդիրներ չեն ունենա:
Ալբերտ Բլբուլյանի և Արմեն Կարադավիդովի մտերիմ շրջապատում շրջանառվող լուրերի համաձայն` ՀՀ իրավապահներին դժվար թե հաջողվի նրանց տեղափոխել Հայաստան, քանի որ Վրաստանում նրանց խնդրով հետաքրքրված են այդ երկրում հայտնի քաղաքական գործիչներ, որոնց հետ կալանավորված անձինք բավական մտերիմ կապերի մեջ են:
Ավելին` մեզ հայտնի դարձավ, որ Ալբերտ Բլբուլյանի և Արմեն Կարադավիդովի մտերիմները իրենց շրջապատում ասել են, թե դեպքից հետո նրանք պատահական չեն հատկապես Վրաստան փախել: Նրանք շատ լավ գիտակցել են, որ դեպքից հետո իրավապահները անմիջապես իրենց հետքի վրա են դուրս գալու: Ուստի ի սկզբանե նահանջի ուղիներ են ծրագրել և սպանությունից հետո մինչ Հայաստանի իրավապահները փորձում էին կրակոցների հեղինակներին պարզել, պոտենցիալ կասկածյալները հատել են հայ-վրացական սահմանը:
Ի դեպ, նշենք, որ այս օրերին ՀՀ իրավապահները ստանում են վերոնշյալ քրեական գործով նշանակված փորձաքննությունների պատասխանները: Ինչպես հայտնի է` դեպքից հետո նշանակվել էին մի շարք փորձաքննություններ, այդ թվում նաև սպանված Գագիկ Մոսինյանի, հյուրանոցի ուղղությամբ արձակված կրակոցների հետ կապված: Արդյունքում` նշանակված փորձաքննություններով հաստատվել է, որ հյուրանոցի ուղղությամբ և Գագիկ Մոսինյանի սպանության պատճառ դարձած կրակոցները նույն զենքերից են արձակվել:
Ինչևէ, թե ինչպես կհարթվի ՀՀ իրավապահների և Վրաստանի իրավապահների միջև շուրջ 1,5 ամիս ստեղծված «անդունդը», ցույց կտա ժամանակը: Այս պահին պետք է արձանագրենք, որ քրեական գործի քննությունը «տեղում դոփում է», քանի որ չնայած Հայաստանի իրավապահներին հայտնի է, թե ովքեր են սպանության առերևույթ կատարողները, որտեղ են նրանք, բայց միևնույն է` չեն կարողանում նրանց նկատմամբ քրեական հետապնդում իրականացնել: