Հայկական մեղրն ու գինին չինական շուկայո՞ւմ. ինչ քննարկում է տեղի ունեցել ԱԳՆ-ում

Դեկտեմբերի 15-ին ՀՀ ԱԳՆ-ում տեղի է ունեցավ քննարկում՝ նվիրված հայ-չինական առևտրատնտեսական համագործակցության ընդլայնման հնարավորություններին, որը վարում էր ՀՀ ԱԳ նախարարի տեղակալ Ռոբերտ Հարությունյանը։ Քննարկումների ընթացքում Չինաստանի շուկա մուտք գործելու առանձնահատկությունների և հնարավորությունների վերաբերյալ ելույթներով հանդես եկան ԱԳ փոխնախարար Հարությունյանը, ՉԺՀ-ում ՀՀ դեսպան Սերգեյ Մանասարյանը, Հայատանի արդյունաբերողների և գործարարների միության նախագահ Արսեն Ղազարյանը, ՀՀ առևտրաարդյունաբերական պալատի արտաքին կապերի վարչության պետ Վլադիմիր Ամիրյանը:

Քննարկման ընթացքում շնորհանդեսով հանդես եկավ ՉԺՀ-ում Հայաստանի արդյունաբերողների և գործարարների միության լիազոր ներկայացուցիչ Ռուբեն Կոպյանը, ով ներկայացրեց ս.թ. նոյեմբեր ամսին «BRCIC - Չինաստանի Գոտի և Ճանապարհ Համագործակցության Նորարական Կենտրոն»-ում Հայաստանի Համագործակցության գրասենյակի հիմնադրման մանրամասները, գործառույթները և չինական շուկայում հայկական արտադրանքի ներկայացման և աջակցության հնարավորությունները:

Միջոցառմանը մասնակցում էին ՀՀ մի շարք գերատեսչությունների, ոլորտային միությունների, գործարար շրջանակների և այլ շահագրգիռ կառույցների ներկայացուցիչներ:

Հանդիպման ընթացքում քննարկվեցին հայ-չինական առևտրատնտեսական հարաբերությունների խորացման միտումները և առկա խնդիրների ուղղությամբ իրականացվող աշխատաքները:

Քննարկման վերջում բանախոսները պատասխանեցին մասնակիցներին հետաքրքրող հարցերին, որոնք վերաբերում էին ՀՀ-ից ՉԺՀ գինու, մեղրի արտահանմանը, ՉԺՀ-ից զբոսաշրջության խթանման ուղղությամբ իրականացվող քայլերին, ինչպես նաև 2018թ.-ին ՉԺՀ-ում կազմակերպվելիք տնտեսական բնույթի խոշոր միջոցառումներին հայկական կողմի պատշաճ մասնակցությանը: