Դեկտեմբերի 20-ից կգործարկվի Կապան-Ջուլֆա ավտոբուսային երթուղին. Սյունիքի մարզպետ
Հայաստանը կարող է ամուրջ լինել Իրանի գործարարների համար.և իրենք են պատրաստ ապրանքներ ներմուծել, մենք էստեղից շարունակենք իրենց ապրանքի առաջխաղացումը և հակառակը, այնտեղից, որտեղ նրանք դժվարանում են ապրանք բերել, հայկական ընկերությունները կարող են բերել: Այս մասին, այսօր՝ դեկտեմբերի 15ժին, Մեղրիի ազատ տնտեսական գոտու բացման ժամանակ, լրագրողների հետ զրույցում նշեց Սյունիքի մարզպետ Վահե Հակոբյանը:
Նրա խոսքով, իրեն են դիմել բելառուս, ուկրաինացի և վրացի գործարարներ, որոնք հետաքրքրված են Հայաստանում գործունեություն ծավալելով, այդ թվում Մեղրիի ազատ տնտեսական գոտիով. «Ուկրաինացիներն ուզում են ցորեն արտահանել մինչև Իրան, նաև վառելիք տանել Ուկրաինա»,-ասաց նա:
Մարզպետը տռեղեկացրեց, որ դեկտեմբերի 20-ին Իրանից մեծ պատվիրակություն է գալու Կապան, որտեղ տեղի է ունենալու իրանական առևտրային գրասենյակի բացումը. «Մենք նույնը բացել ենք Ջուլֆայում: Հուսով եմ, այդ օրը կգործարկվի Կապան-Ջուլֆա ավտոբուսային երթուղին: Դրա վերաբերյալ արդեն պայմանավորվածություն ունենք մեր պարսիկ գործընկերների հետ».-ասաց Վահե Հակոբյանը:
Նշենք, որ դեռ նախորդ տարի «Սյունիք ազատ տնտեսական գոտի» ՍՊԸ-ի և Տնտեսական զարգացման և ներդրումների նախարարության միջև կնքվել է պայմանագիր, որով ՍՊԸ-ն իրավունք է ստացել սկսել Ագարակում ազատ տնտեսական գոտու ձևավորումը: Հայաստան-Իրան սահմանին ազատ տնտեսական գոտին պետք է բացվեր դեռևս հոկտեմբերին: Տնտեսական զարգացման և ներդրումների նախարարի տեղակալ Հովհաննես Ազիզյանի ներկայացմամբ, 10 տարվա ընթացքում կանխատեսվում է, որ ընկերությունը ազատ տնտեսական գոտու ստեղծման մեջ կներդնի շուրջ 30 մլն դոլար: Իսկ 1-ին փուլի աշխատանքներում նախատեսվում է ներդնել 2.5-3 մլն ԱՄՆ դոլար:
Փոխնախարարի խոսքով, շատ ընկերություններ են հետաքրքրված ազատ տնտեսական գոտում ներդրումներ կատարելու և գործունեություն ծավալելու հարցում: Նշվում է, որ Հայաստան-Իրան սահմանին, Ագարակ քաղաքի մոտական տարածքում ստեղծվելիք ազատ տնտեսական գոտում գործունեությունը ծավալվելու է գյուղմթերքի, սննդի վերամշակումից մինչև նոր բարձր տեխնոլոգիական նյութերի արտադրություն, դեղագործություն և տեքստիլ արդյունաբերություն: Ազատ տնտեսական գոտում գործելու է մաքսակետ, արտադրական տարածք, բիզնես կենտրոն: Այդտեղ այցելուներն ապրանքները կգնեն առանց մաքսատուրքի: Սա Եվրասիական տնտեսական միության տարածքում ստեղծված 7 գոտիներից մեկն է լինելու, որում գործելու է նաև «Դյութի ֆրի» համակարգ: