Սերժ Սարգսյանի գնահատականը՝ Կարեն Կարապետյանի կատարած աշխատանքներին (տեսանյութ)
Դիտարկմանը, թե Կարեն Կարապետյանը մի քանի անգամ ասել է, որ պատրաստ է շարունակել զբաղեցնել վարչապետի պաշտոնը, Սերժ Սարգսյանը «Արմենիա» հեռուստաընկերության «Բանաձև» հաղորդաշարում ասել է.
«Ժամանակը դեռ չի եկել։ Երբ կգա, կհայտարարեմ։ Մենք (ՀՀԿ-ն) վերջիվերջո իրավունք ունենք որոշելու, թե ով որտեղ ավելի արդյունավետ կարող է աշխատել։ Ինչ վերաբերում է Կարեն Կարապետյանի ցանկությանը, շատ լավ, առողջ, տրամաբանված ցանկություն է»։
Գնահատելով Կարեն Կարապետյանի կառավարության գործունեությունը՝ Սերժ Սարգսյանը նշել է, թե այդ կառավարության առջև էլ շատ կոնկրետ խնդիր էր դրված՝ հասնել արդյունավետ կառավարման։ «Այո, տնտեսական աճի կոնկրետ խնդիրներ չենք դրել, որովհետև դրանք պայմանավորված էին ինտեգրացիոն պրոցեսների որոշ խնդիրներով։ Բայց կարծում եմ, որ իրենք իրենց առջև են խնդիր դրել,և դա 5-6 տոկոս տնտեսական աճն է»,- նշել նախագահը։
«Բարեկեցության միակ ճանապարհը տնտեսական աճն է։ Մեր կառավարությունն այս առումով մեծ ջանքեր է գործադրում: Մենք ամեն ինչ պիտի անենք, որ մեր տեսական աճը լինի շոշափելի։ Մենք ավելի շատ պիտի արտադրենք, ավելի շատ աշխատատեղ ստեղծենք» - ասել է նա։
Խոսելով հաջորդ տարվա ապրիլից իշխանության փոփոխման մասին ՀՀ նախագահը ասել է.։
«Իշխանության գծապատկերը Սահմանադրությունն է սահմանել։ Եթե նկատի ունեք կոնկրետ պաշտոնատար անձանց, ապա բնական է, որ ես իմ գործընկերները մշտապես փնտրտուքի մեջ են: Սահմանված ժամկետներում կզբաղեցվեն բոլոր պաշտոնները։ Մարդիկ իրավունք ունեն ակնկալելու ինչ-որ բաներ։ Բայց որևէ իշխանություն նախօրոք նման բաներ չեն ասում։ Պետական պաշտոններում նշանակելու հարցը նախօրոք ասելը սխալ է»։
Արտակ Ալեքսանյանի դիտարկմանը, թե «դատելով Ձեր ծրագրերից՝ դուք նման չեք պաշտոնյայի, որը եզրափակում է իր կարիերան», Սերժ Սարգսյանը պատասխանել է. «Բոլոր դեպքերում ճիշտ ճանապարհը սա է, պետք է մինչև վերջին պահը բարեխիղճ կատարել այն պարտականությունները, որ դու կամովին ես ստանձնել։ Ես պատրաստ պիտի լինեմ մինչեւ վերջին վայրկյանը կատարել իմ պարտականությունները Դրանից հետո կտեսնենք՝ ինչ կլինի»։
Հարցին, թե կշարունակի մնալ քաղաքականության մեջ, Սերժ Սարգսյանը պատասխանել է. «Կտեսնենք»։