«Ելք» դաշինքը առաջարկում է փոփոխությունների նախագիծ մշակել մանկապարտեղ հաճախող երեխաների ծնողների համար
«Ելք» դաշինքի երկու անդամներ առաջարկում են փոփոխություններ կատարել ՀՀ աշխատանքային օրենսգրքում, որոնց համաձայն՝ մանկապարտեզ հաճախող երեխայի ծնողներից մեկին իրավունք կտրվի աշխատանքն ավարտել սովորականից շուտ:
Երևանի ավագանու կրթության, մշակույթի և սոցիալական հարցերի մշտական հանձնաժողովի նախագահ, «Ելք» խմբակցության անդամ Արայիկ Հարությունյանը, որն ակտիվորեն զբաղվում է մանկապարտեզներին առնչվող խնդիրներով և Ազգային ժողովի «Ելք» խմբացկության պատգամավոր Լենա Նազարյանը մշակել են օրենսդրական համապատասխան փոփոխությունների նախագիծ, որն այսօր դրվել է շրջանառության մեջ:
«Առաջարկում ենք մանկապարտեզ հաճախող երեխա ունեցող ծնողներից որևէ մեկի աշխատանքային ժամանակը սահմանափակել ոչ ուշ, քան 17:00-ով: Հայտնի է, որ համայնքային ենթակայության մանկապարտեզներում աշխատանքային ժամն ավարտվում է 17:30-ին, և աշխատող ծնողների գերակշիռ մասը մեծագույն խնդիրներ է ունենում երեխային մանկապարտեզից վերցնելու, այդ ժամանակահատվածում նրա խնամքը կազմակերպելու առումով: Այս նախաձեռնությամբ փորձում ենք նաև աջակցել, որպեսզի այդ ծնողները զերծ մնան լրացուցիչ դժվարություններից, աշխատատեղում աշխատատուի հետ խնդիրներից, լրացուցիչ դայակ վարձելու անհրաժեշտությունից և այլն»,- մեզ հետ զրույցում մանրամասնեց Արայիկ Հարությունյանը:
Նա ասաց, որ եթե առաջարկվող օրենսդրական փոփոխություններն ընդունվեն, ապա դրանք վերաբերելու են ոչ միայն պետական հիմնարկներին, այլ նաև մասնավորներին:
«Օրենքը լինելու է բոլորի համար անխտիր: Ես կարծում եմ (վերջին ամիսների ուսումնասիրությունն էլ ցույց է տալիս), որ ծնողները մասնավորի հետ մեծ մասամբ, այնուամենայնիվ, կարողանում են ճկուն գրաֆիկ կազմել: Մյուսների դեպքում կփորձենք մանկապարտեզներում լրացուցիչ ժամեր ավելացնելով այդ խնդիրը լուծել»,- շարունակեց ավագանու անդամը:
Ամեն դեպքում նա նկատեց, որ մանկապարտեզների երկար աշխատանքը հարցի ճիշտ լուծում չէ: «Ուսումնասիրությունը նաև ցույց տվեց, որ շատ անցանկալի է մանկապարտեզներում երեխաների ավելի երկար մնալը: 3-6 տարեկան երեխաների դեպքում ընտանիքից 10-11 ժամով բացակայությունը լուրջ խնդիր է, դրա համար ավելի նպատակահարմար էր այս նախաձեռնությամբ հանդես գալը: Բայց եթե լինեն (ու կլինեն) ծնողներ, որոնք, այնուամենայնիվ, չեն կարողանա ժամը 17:00-ին ավարտել աշխատանքը, կփորձենք լրացուցիչ հնարավորություն ստեղծել, որի արդյունքում իրենց երեխաները ևս մեկ ժամ կմնան մանկապարտեզներում, այսինքն՝ մինչև 18:30-ը»,- պարզաբանեց մեր զրուցակիցը:
Նրա խոսքով, «Նախադպրոցական կրթության մասին» գործող օրենքն, իհարկե, հնարավորություն տալիս է ծնողների պահանջով մանկապարտեզներում երկարօրյա խնամք կազմակերպել, բայց դա նույն օրենքի այն մի շարք դրույթներից մեկն է, որը չի իրագործվում:
«Օրինակ՝ «Նախադպրոցական կրթության մասին» օրենքով այդ կրթությունը պետք է կազմակերպվի զրո տարեկանից, այսինքն՝ տեսականորեն պետք է մանկապարտեզները կարողանային երեխայի ծնվելուց կարճ ժամանակ անց խնամքի հնարավորություն ստեղծեին աշխատող ծնողների համար, բայց դա չկա: Այսօր շատ մանկապարտեզներ առավելագույնը երեք տարեկանից են կարողանում երեխաներին խնամքի վերցնել: Այնտեղ, որտեղ մսուր կա՝ երկու տարեկանից: Այսինքն՝ զրո տարեկանի մասին խոսք չկա»,- առկա իրավիճակը ներկայացրեց Արայիկ Հարությունյանը: