Ավտոբուսի դռները չեն փակվել, գազ է միացրել, որ տաքացնի. Դիլիջանի երթուղային ավտոբուսի սեփականատիրոջ պարզաբանումը (լուսանկարներ)

Տավուշի մարզի Դիլիջան քաղաքի երթուղային ավտոբուսը, որի մեջ ուղևորների ներկայությամբ գազ է վառվել, պատկանում է «ԲԻԼՏրանս» ՍՊԸ-ին: NEWS.am-ի հետ զրույցում ՍՊԸ-ի տնօրեն Էմին Մարգարյանը նշեց, որ երթուղային ավտոբուսում վարորդն առավոտյան է գազ վառել՝ այն տաքացնելու նպատակով:

«Ես քաղաքում չեմ, ինձ այդ մասին ասել են, անմիջապես զանգել եմ վարորդին, ինձ բացատրել է, որ առավոտյան ժամը 7-ին ավտոբուսի դռները սառած են եղել, չեն փակվել և գազը միացրել է դռները տաքացնելու նպատակով: Նա այդ պահին ավտոբուսը կանգնեցրել է և նոր է գազը միացրել, իսկ ոմանք լուսանկարել և տարածել են այն»,-ասաց նա:

Արդյոք երթուղային ավտոբուսը տաքացուցիչ չունի և ինչու են ուղևորներին և ավտոբուսը տաքացնելու համար այդպիսի տարբերակ ընտրել, Էմին Մարգարյանը պատասխանեց. «Իհարկե տաքացուցիչ ունի, բայց, քանի որ ավտոբուսը շատ մեծ է, դռները բարձր են, միայն տաքացուցիչով չի լինի»:

ՍՊԸ տնօրենը նաև նշեց, որ վարորդը, որն այդպիսի բան է արել, վաղվանից այլևս չի աշխատի իրենց ընկերությունում որպես վարորդ:

Դիլիջանի քաղաքապետարանի մամուլի հետ կապերի բաժնից էլ մեզ տեղեկացրին, որ քաղաքապետարանում արդեն տեղյակ են կատարվածի մասին և ուսումնասիրություններ են կատարում:

Նշենք, որ այսօր «Ֆեյսբուք» սոցիալական կայքում Մելինա Խեչիկյան անունով օգտատերը լուսանկար էր տեղադրել, որտեղ երեւում է, թե ինչպես է Դիլիջանի երթուղային ավտոբուսում վարորդը գազ վառում: