Արաքսի ափապաշտպան աշխատանքների դադարեցման հետ ՌԴ սահմանապահները կապ չունեն, առարկություններ ունի իրանական կողմը. Ա. Հարությունյան

Այսօր կառավարության նիստի չզեկուցվող հարցերի շրջանակում էր Էներգետիկ ենթակառուցվածքների և բնական պաշարների նախարարության Ջրային տնտեսության պետական կոմիտեի կարիքների համար ստորագրված պայմանագիրը դադարեցնելու հարցը:

Կնքված պայմանագրի շրջանակներում ՀՀ Սյունիքի մարզում Մ-2 Երևան-Գորիս-Մեղրի-Իրանի սահման միջպետական ավտոմայրուղու 379+200 կմ երկարությամբ հատվածում՝ Արաքս գետի ափի շուրջ 40 մ երկարությամբ հատվածի վթարային վիճակի վերացման աշխատանքների նախապատրաստական բոլոր փուլերը կատարվել են: Հիմնավորման մեջ նշվում է, որ քանի որ վերոնշյալ հատվածը Արաքս գետով սահմանակից է Իրանի Իսլամական Հանրապետությանը և մեր ափամերձ տարածքները հսկվում են ՌԴ-ի 2393 սահմանապահ զորամասի կողմից, ուստի անհրաժեշտ էր կողմերի միջև ձեռք բերել համաձայնություն նշված հատվածում աշխատանքների կատարման և ավարտման համար: Սակայն աշխատանքային կարգով հանդիպումների ընթացքում հնարավոր չի եղել արդյունավետ համագործակցել և կողմերի միջև համաձայնություն ձեռք չի բերվել:

Ջրային տնտեսության պետական կոմիտեի նախագահ Արսեն Հարությունյանից լրագրողները պարզաբանում խնդրեցին, թե ինչպես Ռուսաստանի սահմանապահ զորքերը կարող են թույլ չտալ շինարարությունը. վերջինս պատասխանեց, որ հարցը սխալ է հասկացվել, և խոսքը Ռուսաստանի սահմանապահների մասին չէ։

«Պայմանագրով ընդհանուր 12,2 միլիոնի աշխատանքներ են նախատեսված, որի հիմնականը՝ 9-5 միլիոնի աշխատանքը, ավարտվել է. քանի որ իրանական կողմի հետ բանակցությունները դեռ շարունակվում են և այս տարի չեն ավարտվելու, ստիպված պայմանագիրը ավարտում ենք, որ շինարարը տույժ-տուգանքների տակ չընկնի: Բանակցություններն իրականական կողմի հետ շարունակվում են, ռուս սահմանապահները որևէ կապ չունեն այս ամենի հետ»,-ասաց նա:

Նա նշեց, որ ռուսական կողմը մեզ հետ միասին բանակցություններ է վարում իրանական կողմի հետ: Երբ մեջբերվեց նախագծի հիմնավորման մեջ գրվածը, ըստ որի՝ խնդիրը ռուսական սահմանապահների հետ են բանակցությունները, և նրանք համաձայնություն չեն տալիս, Արսեն Հարությունյանը նշեց, որ վրիպակ է եղել:

«Մենք բանակցում ենք իրանական կողմի հետ, եթե իրանական կողմը համաձայնություն չի տալիս, նշանակում է, որ թելը կտրվում է: Մենք ռուսական կողմի հետ որևէ խնդիր չունենք»,-ասաց նա:

Նա պարզաբանեց, որ ափապաշտպան աշխատանքների արդյունքում գետի հունը փոխվում է, և իրանական կողմը ունի առարկություններ, քանի որ գետը թեքվում է դեպի մեր կողմը: «Իրանական կողմը հարց է բարձրացել, և հիմա քննարկումներ են ընթանում։ Խոսքը 40 մետր մասին է»,-ասաց նա:

Դիտարկմանը, բայց նշված է որ բանակցություններ դադարեցվել են, կոմիտեի նախագահն ասաց. «Դադարեցնում ենք բանակցությունները, քանի որ շինարարը տույժ-տուգանքի տակ է ընկնում, մենք պարտավոր ենք նրա կենսագրությունը մաքուր պահել, քանի որ շինարարի պատճառով չէ, որ աշխատանքները դադարեցվում են: Ժամանակավոր աշխատանքները դադարեցվում են»:

Արսեն Հարությունյանը նշեց, որ ռուսական կողմը հանդես է գալիս մեզ հետ: «Ռուսական կողմի հանձնարարությունը ընդհանրապես կապ չունի, ռուսական կողմը չի կարող չհամաձայնել, ձայնի իրավունք չունի, և որոշում ընդունողը հայկական և իրանական կողմն են»,-ասաց նա:

Ինչ վերաբերում է հարցին, թե ինչու են այդ դեպքում ռուս սահմանապահները մասնակցում բանակցություններին, նա ասաց, որ որովհետև ռուսական կողմն է սահմանը պահում: Ըստ նրա՝ դա ինքնիշխանության իրավունքի ոտնահարում չէ: