Կյանքում մի սեր ունենալը տխուր բան է, լիարժեք ապրելու համար պետք է ունենալ սերեր. Ռոզի Ավետիսովա
Վերջիններս կատարում են անկեղծ խոստովանություններ, պատմում են, թե ինչ հարաբերություններ ունեն իրենց առաջին սերերի հետ:
Այս անգամ «Ժողովուրդ»-ի զրուցակիցը «Փեսացուն կրկեսից», «Սահմանին», «Եվա» ֆիլմերից, «Հրեշտակների դպրոց», «Տիգրանի մոլորակը», «Ամնեզիա» հեռուստասերիալներից հայտնի դերասանուհի Ռոզի Ավետիսովան է:
Նա նախ նկատեց, որ առաջին սիրո հետ կապված զգացողությունները մեծապես կախված են այն հանգամանքից, թե որ տարիքում է այն մարդուն այցելում.
«Ամեն դեպքում, առաջին սիրո մասին շռայլված խոսքերը, կարծում եմ, չափազանցություն են, դրանք արդեն կարող են տեղ գտնել գրականության մեջ, բայց կյանքում ամեն բան այլ է: Ես համամիտ եմ միայն այն տեսակետին, որ երբ որևէ բան առաջինն է քո կյանքում, այն արդեն իսկ եզակի է: Բացի այդ՝ առաջին սերը կարող է թողնել հետևանքներ, նաև դրանից է կախված, թե հետագայում ինչ ընտրություն կկատարես»:
Ռոզին շեշտեց՝ ամենակարևորն այն է, որ քո ապրած սերերը միմյանց հետ չհամեմատես. ամեն սեր լինի սիմվոլիկ և իր տեղը զբաղեցնի քո սրտում.
«Ես առաջին անգամ սիրահարվել եմ պատանի հասակում: Դա շատ սիրուն ընթացք էր իմ կյանքում, որը վերհիշում եմ ժպիտով: Կարծում եմ՝ առաջին սերը ոչ ոքի մոտ էլ նեգատիվ հիշողություններ չի արթնացնում»:
Հարցին, թե ինչու, այնուամենայնիվ, իրենց հարաբերություններն ընթացք չստացան, Ռոզին պատասխանեց.
«Դժվար է միանշանակ պատասխանել, բայց երևի շատ փոքր էինք ու հասկանում էինք, որ լուրջ քայլերի գնալու ժամանակը չէր, որովհետև չգիտեինք, թե կյանքը մեզ ուր կտաներ: Բացի այդ՝ ինձ սպասում էին ինստիտուտը, դերասանական ոլորտի հետ կապված երազանքներն ու նպատակները: Ամեն դեպքում, չեմ փոշմանում, որ մեր հարաբերությունները նման ավարտ ունեցան»:
Մենք նաև հետաքրքրվեցինք՝ արդյոք իրենց հարաբերությունների ավարտից հետո հանդիպել է այդ տղային.
«Ո՛չ, մեր ուղիները չեն խաչվել, բայց գուցե եթե տեսնվենք, հարցնեմ, թե ինչպես է: Չեմ մտածել այդ ուղղությամբ: Կարծեմ նա արդեն ամուսնացել է և հայր է դարձել»,-ասաց Ռոզին՝ հավելելով, որ ինքը ևս ունի ընտրյալ:
Դերասանուհին եզրափակեց՝ սերն այնպիսի զգացմունք է, որն ամեն տարիքում ուրիշ կերպ ես ընկալում.
«Կյանքը լիարժեք ընկալելու համար մի սերը քիչ է, պետք է սերեր ունենալ, որ հասկանաս՝ հագեցած ես ապրել կյանքդ: Ընկալումների փոփոխությունն է, որ կյանքդ դարձնում է լեցուն: Կյանքում մի սեր ունենալը տխուր բան է»: