Դիլիջանի միջմշակութային փոխանակում» ծրագրի արդյունքների ամփոփում (լուսանկարներ)
Դեկտեմբերի 8-ին «Դիլիջանի միջմշակութային փոխանակում» ծրագրի արդյունքների ամփոփման ժամանակ IDeA հիմնադրամի համահիմնադիր, գործարար Ռուբեն Վարդանյանը խոսել է կառուցապատումների մասին։
Նշենք, որ «Դիլիջանի միջմշակութային փոխանակում» ծրագրի նպատակը Դիլիջան քաղաքի պատմությունն ու անցյալը վեր հանելը և այն լայն հանրությանը ներկայացնելն է։ Ծրագրի շրջանակում հայ և գերմանացի փորձագետները չորս շաբաթ աշխատել են Դիլիջանում: Այդ ընթացքում Դիլիջանի մասին պատմական փաստեր, լուսանկարներ ու վկայություններ են հավաքագրել։
Ռուբեն Վարդանյանի համոզմամբ՝ Հայաստանում շենքեր կառուցելը հեշտ է, իսկ մտածելակերպ փոխելը՝ դժվար և ժամանակ է պահանջում։
Ըստ նրա՝ հաջորդ կարևոր քայլը պետք է լինի սեփական սխալներն ընդունելն ու առաջ շարժվելը. «Մենք նպատակադրվել ենք Հայաստան բերել ոչ միայն նոր տեխնոլոգիաներ, այլև նոր մշակույթ, որպեսզի մարդիկ խոստովանեն սխալներն ու ազնվորեն խոսեն ամեն ինչի մասին»։
Գործարարը նաև հավելեց, որ խոսքը երկարաժամկետ հեռանկարի մասին է. «Մենք խոսում ենք ոչ թե 2-3 տարվա, այլ 20 և ավելի տարիների մասին»։
Ծրագիրը ներկայացնելիս IDeA հիմնադրամի գլխավոր տնօրեն Րաֆֆի Պաղճեանը, մասնավորապես, նշեց. ««Դիլիջանի միջմշակութային փոխանակում» ծրագիրը մեր գործընկերների, տեղական համայնքների և միջազգային շահառուների միջև արդյունավետ համագործակցության հիանալի օրինակ է, որի արդյունքներից կարող են օգտվել թե՛ դիլիջանցիները, թե՛ Դիլիջանի պատմությամբ հետաքրքրվողները»:
«Դիլիջանի միջմշակութային փոխանակում» ծրագիրն իրականացվել է «Համագործակցություն քաղաքացիական հասարակության հետ» ծրագրի շրջանակում` IDeA հիմնադրամի աջակցությամբ և Գերմանիայի ԱԳ նախարարության ֆինանսավորմամբ։