Թուրքական կայքը հոդված է հրապարակել «հեքիաթային Կարսի մասին, որտեղ ծնվել է Չարենցը»
Թուրքիայում Сumhuriyet պարբերականը հոդված է հրապարակել Կարսի մասին, որում հեղինակն ընդգծել է` այդ քաղաքում է ծնվել հայ գրող Եղիշե Չարենցը: Այս մասին փոխանցում է ArmTimes.com-ը:
«Եթե ուզում եք տեսնել այդ հեքիաթային քաղաքը, որը ժամանակ առ ժամանակ իզոլացված է եղել և պատմության հետքն է կրում, մի վախեցեք ցրտերից: Այնտեղ դուք պատմության վեհությունը կտեսնեք: Կարսի գրեթե բոլոր պատմական շենքերը կառուցվել են Ռուսաստանի իշխանության 40 տարիների ընթացքում: Դրանց մինչև այսօր ոչինչ չի ավելացվել», նշված է հոդվածում:
Եվ հավելում կա այն մասին, որ պատերազմից հետո որպես ռազմավար Կարսը վերցրած ռուսներն են գծել քաղաքային պլանը` լայն ճանապարհներով, մայթերով, մեծ զինանոցներով և պաշտոնական շենքերով:
Ռուս-թուրքական 1828-1829, 1853-1856 թթ. պատերազմների ժամանակ ռուսական բանակը գրավում է Կարսը, սակայն Պետերբուրգը Արևմտյան Հայաստանի ու հայության իղձերի հաշվին միշտ զիջումներ է անում թուրքերին, փոխարենը իր դիրքերն ամրապնդում Բալկաններում։ Միայն 1877-1878 թթ. ռուս-թուրքական պատերազմի ժամանակ ռուսական զորքը կոմս Լորիս-Մելիքովի հրամանատարությամբ փայլուն գրոհով գրավեցին Կարսը, և այն միացավ Ռուսական կայսրությանը։ Կազմվեց Կարսի մարզը, որի մեջ մտան նաև Արդահանի, Կաղզվանի, Օլթիի շրջանները։
1918 թ. նորաստեղծ Խորհրդային Ռուսաստանը Բրեստ-Լիտովսկի պայմանագրով դարձյալ վաճառքի հանեց Հայաստանն ու հայության շահերն, ու Կարսի մարզը ճանաչեց Թուրքիայի անբաժանելի մաս։ Ամիսներ անց թուրքերը զենքի ուժով ամրագրեցին իրենց դիվանագիտական նվաճումն ու գարնանը գրավելով Կարսը՝ առաջացան դեպի Արարատյան դաշտ։ 1919 թ. Հայաստանի Հանրապետության բանակը ազատագրեց Կարսը։ Քաղաքում կրկին աշխուժացավ հայկական կյանքը։ Հազարավոր ընտանիքներ վերադարձան և բնակեցրին քաղաքը։ 1920 թ. աշնանը թուրք-բոլշևիկյան դաշինքը արյան մեջ խեղդեց Հայաստանի անկախությունը, և թուրքական բանակը գրավեց Կարսը։ Իսկ 1921 թ. Խորհրդային Ռուսաստանը Մոսկվայի և Կարսի պայմանագրերով Կարսի մարզը հանձնեց իր բարեկամ Թուրքիային։