«Այվազյանն ընդդեմ Հայաստանի» գործով ՀՀ կառավարությունը 15 000 եվրո կփոխհատուցի ՌԴ քաղաքացուն
Հայաստանի Հանրապետության կառավարությունը ՄԻԵԴ վճռի պահանջները կատարելու նպատակով 15 000 եվրո կհատկացնի ՄԻԵԴ դիմումատուին: Հարցը կառավարության նիստերի օրակարգի չզեկուցվող հարցրի թվում էր:
Կառավարության որոշմամբ Մարդու իրավունքների եվրոպական դատարանի «Այվազյանն ընդդեմ Հայաստանի» գործով 2017 թվականի հունիսի 1-ի վճռի պահանջները կատարելու նպատակով ՀՀ 2017 թվականի պետական բյուջեով նախատեսված ՀՀ կառավարության պահուստային ֆոնդի հաշվին Արդարադատության նախարարությանը կհատկացվի 15000 եվրոյին համարժեք Հայաստանի Հանրապետության դրամ` վճռով սահմանված արդարացի հատուցման համար:
Սույն գործը հարուցվել է «Մարդու իրավունքների և հիմնարար ազատությունների պաշտպանության մասին» կոնվենցիայի 34-րդ հոդվածի համաձայն, Ռուսաստանի քաղաքացի Սիլվարդ Այվազյանի կողմից ընդդեմ Հայաստանի Հանրապետության՝ 2008 թվականի նոյեմբերի 20-ին Դատարան ներկայացված գանգատի հիման վրա:
Դիմումատուն պնդել է, մասնավորապես, որ իր եղբայր Սեյրան Այվազյանին 2006 թվականին կյանքից զրկել են ոստիկանության ծառայողները՝ Կոնվենցիայի 2-րդ հոդվածի խախտում համարվող հանգամանքներում, և որ համապատասխան մարմինները նրա մահվան կապակցությամբ արդյունավետ քննություն չեն իրականացրել: 2011 թվականի սեպտեմբերի 6-ին գանգատն ուղարկվել է կառավարություն։ Ռուսաստանի կառավարությունը չի իրականացրել Կոնվենցիայի 36-րդ հոդվածի 1-ին մասով միջամտելու իր իրավունքը։
Գործի փաստական հանգամանքներում նշվում է, որ Սեյրան Այվազյանն ունեցել է հոգեկան հիվանդություն (պարանոիդ շիզոֆրենիա) և տվյալ ժամանակահատվածում բնակվել է մենակ՝ Հայաստանի Լոռու մարզի Օձուն գյուղում։
ՄԻԵԴ վճռով տեղի է ունեցել Կոնվենցիայի 2-րդ հոդվածի ընթացակարգային խախտում այն առումով, որ համապատասխան մարմինները Սեյրան Այվազյանի մահվան հանգամանքների վերաբերյալ արդյունավետ քննություն չեն իրականացրել:
ՄԻԵԴ-ը վճռել է, որ ինչ վերաբերում է ոստիկանության ծառայողների գործողություններին, ապա Սեյրան Այվազյանի մահվան մասով Կոնվենցիայի 2-րդ հոդվածի 1-ին կետի՝ կյանքի իրավունքի խախտում չի արձանագրվել:
ՄԻԵԴ-ը մերժել է դիմումատուի՝ արդարացի փոխհատուցման պահանջի մնացած մասը: