Վարչապետն անդրադարձավ ներմուծվող հավի մսի որակին
ՀՀ Կառավարության այսօրվա նիստում վարչապետ Կարեն Կարապետյանը հանձնարարեց մարզպետներին քսանօրյա ժամկետում տարածքային կառավարման եւ զարգացման նախարարություն ներկայացնել այս տարվա գործունեության ծրագրի մասին ամփոփումը, որտեղ պետք է ներկայացված լինեն մեկ շնչին բաժին ընկնող եկամուտների աճի, աղբահանության եւ մաքրման աշխատանքների ու այդ աշխատանքների դիմաց գանձված գումարների մասին ցուցանիշները: «Մենք պետք է այդ ցուցանիշներն ուղղորդենք միջին հանրապետական ցուցանիշներին համապատասխան»,- ասաց վարչապետը:
Վարչապետը հանձնարարեց նաև մարզպետներին կառավարություն ներկայացնել գյուղատնտեսական ծրագրերի շահառուների, սպանդանոցների թիվը:
Երկրորդ հանձնարարականը վերաբերում էր հաջորդ տարվա անելիքները ներկայացնելուն: ՀՀ գործադիր մարմինները քսան օրում պետք է ամփոփեն եւ ներկայացնեն գալիք տարվա գործունեության միջոցառման ծրագիրը, խնդիրները եւ արդյունքները, կատարման ժամկետները եւ ներդրումները:
Գործադիր մարմնի ղեկավարն անդրադարձավ մամուլում տեղ գտած ներմուծված սառեցված հավի մսում հայտնաբերված խախտումներին: Վարչապետն առաջարկեց ՍԱՊԾ-ին եւ տնտեսական զարգացման եւ ներդրումների նախարարությանը` քսան օրում տեղայնացնել սննդի փորձաքննության միջազգային նորմերը եւ այն ռիսկերը, որոնք առնչվում են ներմուծվող եւ արտահանվող սննդի փորձաքննությանը: